కేంద్రానిది ‘సమాఖ్య’పై దాడే

ఆప్‌ ఆందోళనకు మద్దతు - సీపీఎం ప్రధాన కార్యదర్శి సీతారాం ఏచూరి

దిల్లీ: దిల్లీలో పరిపాలన సేవల నియంత్రణపై కేంద్రం ఆర్డినెన్స్‌ తీసుకురావడం సమాఖ్య వ్యవస్థపై దాడి చేయడమేనని సీపీఎం ప్రధాన కార్యదర్శి సీతారాం ఏచూరి విమర్శించారు. కేంద్రం చర్యను ఖండిస్తున్నట్లు తెలిపారు. పార్లమెంటు ముందుకు ఆర్డినెన్స్‌ స్థానంలో బిల్లును తీసుకొచ్చినప్పుడు ఆప్‌నకు మద్దతుగా దానిని వ్యతిరేకిస్తామని స్పష్టం చేశారు. దిల్లీలోని సీపీఎం కార్యాలయంలో ఏచూరితో దిల్లీ ముఖ్యమంత్రి, ఆప్‌ జాతీయ కన్వీనర్‌ అరవింద్‌ కేజ్రీవాల్‌ మంగళవారం సమావేశమయ్యారు. ఈ సందర్భంగా ఆర్డినెన్స్‌ అంశంలో వామపక్ష పార్టీల మద్దతు కోరారు. ఈ క్రమంలో ఆర్డినెన్స్‌ విషయంలో కాంగ్రెస్‌ సహా అన్ని ప్రతిపక్ష పార్టీలు ఆమ్‌ ఆద్మీ పార్టీకి అండగా నిలవాలని ఏచూరి పిలుపునిచ్చారు. కేంద్రం చర్య నిస్సిగ్గు ఉల్లంఘన అని అభివర్ణించారు. రాజ్యాంగం, సమాఖ్య వ్యవస్థకు ఆధారాలైన స్తంభాలపై భాజపా ప్రభుత్వం దాడికి దిగి నాశనం చేస్తోందని ఆరోపించారు. కేజ్రీవాల్‌ మాట్లాడుతూ..ఆర్డినెన్స్‌పై బిల్లు రాజ్యసభ ముందుకు వచ్చినప్పుడు ప్రతిపక్షాల ఐక్యత దాన్ని అడ్డుకుంటుందని ధీమా వ్యక్తం చేశారు.