Rahul Gandhi: రాహుల్‌.. పెళ్లి చేసుకోవయ్యా!

కాంగ్రెస్‌ అగ్రనేతకు లాలూ సూచన

పట్నాలో విపక్షాల భేటీ అనంతరం మీడియాతో మాట్లాడుతూ ఆర్‌జేడీ అధ్యక్షుడు లాలూప్రసాద్‌ తనదైన శైలిలో నవ్వులు పూయించారు. పెళ్లి చేసుకోవాలంటూ కాంగ్రెస్‌ అగ్రనేత రాహుల్‌గాంధీకి ఆయన సూచించారు. ‘‘మా మాట విను.. పెళ్లి చేసుకోవయ్యా. మేమంతా నీ బరాత్‌కు రావాలనుకుంటున్నాం. వివాహానికి నీవింకా విముఖత చూపుతుండటంతో మీ అమ్మ (సోనియాగాంధీ) ఆందోళన చెందుతోంది’’ అని రాహుల్‌ను ఉద్దేశించి లాలూ వ్యాఖ్యానించారు. దాంతో రాహుల్‌ కాస్త సిగ్గుతో ముసిముసి నవ్వులు చిందించారు. ‘మీరు చెప్పారు కాబట్టి.. అది జరుగుతుంది’ అని కూడా ఆయన బదులివ్వడం గమనార్హం.