BSNL: బీఎస్‌ఎన్‌ఎల్‌లో బ్రాడ్‌బ్యాండ్‌ ఇన్‌స్టలేషన్‌ ఛార్జీలు ఉండవ్‌

ఇంటర్నెట్‌ డెస్క్‌: బ్రాడ్‌బ్యాండ్‌ యూజర్లను ఆకర్షించడమే లక్ష్యంగా ప్రభుత్వరంగ టెలికాం సంస్థ బీఎస్‌ఎన్‌ఎల్‌ (BSNL) కీలక నిర్ణయం తీసుకుంది. వచ్చే ఏడాది మార్చి 31 వరకు కనెక్షన్‌ తీసుకునేవారి నుంచి ఎలాంటి ఇన్‌స్టలేషన్‌ ఛార్జీ వసూలు చేయబోమని తెలిపింది.

బీఎస్‌ఎన్‌ఎల్‌ (BSNL) వివిధ రకాల ఇంటర్నెట్‌ సేవలను అందిస్తోంది. కాపర్‌ కనెక్షన్లతో పాటు ఫైబర్‌ ద్వారా కూడా ఇంటర్నెట్‌ సేవలను అందిస్తోంది. దేశవ్యాప్తంగా ఈ సేవలు అందుబాటులో ఉన్నాయి. ఈ నేపథ్యంలో కొత్త చందాదారులను చేర్చుకోవడమే లక్ష్యంగా ఇన్‌స్టలేషన్‌ ఛార్జీలను ఎత్తివేయాలని నిర్ణయించింది.

కాపర్‌ కనెక్షన్లపై రూ.250 ఇన్‌స్టలేషన్‌ ఛార్జీల కింద బీఎస్‌ఎన్‌ఎల్‌ వసూలు చేస్తోంది. ‘భారత్‌ ఫైబర్‌’ కనెక్షన్లపై యూజర్లు రూ.500 చెల్లించాల్సి ఉంటుంది. కంపెనీ తీసుకున్న తాజా నిర్ణయం నేపథ్యంలో యూజర్లు ఎలాంటి ఛార్జీ చెల్లించాల్సిన అవసరం లేదు. భారత్‌ ఫైబర్‌ ప్లాన్లు నెలకు రూ.249 నుంచి ప్రారంభమవుతున్నాయి. ఈ ప్లాన్‌లో భాగంగా యూజర్లు 10 ఎంబీపీఎస్‌ వేగంతో 10 జీబీ డేటా పొందుతారు. పరిమితి ముగిసిన తర్వాత వేగం ఎంబీపీఎస్‌కు తగ్గుతుంది.

ప్రస్తుతం ప్రైవేటు టెలికాం కంపెనీలు సైతం ఇన్‌స్టలేషన్‌ ఛార్జీలను వసూలు చేయడం లేదు. అయితే, వాటిలో కచ్చితంగా దీర్ఘకాల ప్లాన్లను రీఛార్జ్‌ చేసుకోవాల్సి ఉంటుంది. కానీ, బీఎస్‌ఎన్‌ఎల్‌ మాత్రం అలాంటి షరతులేమీ విధించడం లేదు. ఫిక్స్‌డ్‌లైన్‌ బ్రాడ్‌బ్యాండ్‌ సేవల్లో ఒకప్పుడు బీఎస్‌ఎన్‌ఎల్‌కు తిరుగుండేది కాదు. కానీ, భారతీ ఎయిర్‌టెల్‌, రిలయన్స్‌ జియో రాకతో దాని మార్కెట్‌ వాటా పడిపోయింది. దీంతో కస్టమర్లకు ఆకర్షించడం కోసం బీఎస్‌ఎన్‌ఎల్‌ వివిధ రకాల ఆఫర్లను అందిస్తోంది.