వైకాపా కోవర్టు ఎంపీ కేశినేని నాని: మాజీ ఎమ్మెల్సీ బుద్ధా వెంకన్న

విజయవాడ (విద్యాధరపురం), న్యూస్‌టుడే: విజయవాడ ఎంపీ కేశినేని నాని పచ్చి మోసగాడని, వైకాపా కోవర్టు అని తెదేపా రాష్ట్ర ప్రధానకార్యదర్శి, మాజీ ఎమ్మెల్సీ బుద్ధా వెంకన్న ఆరోపించారు. గురువారం విజయవాడ మల్లికార్జునపేటలోని తెదేపా కార్యాలయంలో నాయకులు కేశినేని చిన్ని, నాగుల్‌మీరాలతో కలసి ఆయన ఎన్టీఆర్‌ చిత్రపటానికి పూలమాలలు వేసి నివాళులర్పించారు. ఈ సందర్భంగా వెంకన్న మాట్లాడుతూ తెదేపాలో ఉన్న ఎంపీ కేశినేని నాని వైకాపాలో చేరేందుకు వెళ్తున్న దేవినేని అవినాష్‌ను ఆపలేని అసమర్థుడన్నారు. తెదేపాలో అవినీతిపరులు ఎవరైనా ఉంటే ధైర్యంగా ఆధారాలు చూపి పేర్లతో విమర్శించాలని సవాలు చేశారు. ప్రజారాజ్యం నుంచి చిరంజీవి, తెదేపా నుంచి చంద్రబాబు గెంటేసినా బుద్ధి రాని నానీని వైకాపా అధినేత జగన్‌ కాలితో తన్ని తరిమేస్తారని చెప్పారు.