గుజరాత్‌లో ఆప్‌ ప్రచార తారలుగా కేజ్రీవాల్‌, సిసోదియా

దిల్లీ: మరికొన్ని రోజుల్లో జరగనున్న లోక్‌సభ ఎన్నికలకు గుజరాత్‌లో ఎన్నికల ప్రచారం నిర్వహించే 40 మంది పార్టీ ప్రచార తారలను ఆమ్‌ ఆద్మీ పార్టీ (ఆప్‌) మంగళవారం ప్రకటించింది. వారి పేర్లతో కూడిన జాబితాను ఎన్నికల కమిషన్‌కు ఆప్‌ సమర్పించింది. ఆ ప్రకారం దిల్లీ ముఖ్యమంత్రి అరవింద్‌ కేజ్రీవాల్‌, ఆయన భార్య సునీత, పార్టీ సీనియర్‌ నేతలు మనీశ్‌ సిసోదియా, సత్యేంద్ర జైన్‌, పంజాబ్‌ ముఖ్యమంత్రి భగవంత్‌ మాన్‌లు ప్రచార తారలుగా వ్యవహరించనున్నారు. ఆప్‌ రాజ్యసభ సభ్యులు సంజయ్‌ సింగ్‌, రాఘవ్‌ చడ్డా, సందీప్‌ పాఠక్‌ల పేర్లూ జాబితాలో ఉన్నాయి. కేజ్రీవాల్‌, సిసోదియా, సత్యేంద్ర జైన్‌ తిహాడ్‌ జైల్లో ఉన్నారు. రాజ్యసభ సభ్యులైన హర్బజన్‌ సింగ్‌, స్వాతి మాలీవాల్‌ పేర్లు జాబితాలో లేకపోవడం గమనార్హం.