జాతీయ పార్టీ హోదా దిశగా ఆమ్‌ ఆద్మీ పార్టీ: కేజ్రీవాల్‌

దిల్లీ: ఈ ఏడాది ఫిబ్రవరిలో అసెంబ్లీ ఎన్నికల్లో సాధించిన ఓట్లు, సీట్ల ఆధారంగా ఆమ్‌ ఆద్మీ పార్టీకి కేంద్ర ఎన్నికల సంఘం గోవాలో రాష్ట్ర పార్టీ హోదా ఇచ్చిందని ఆ పార్టీ జాతీయ కన్వీనర్‌ అరవింద్‌ కేజ్రీవాల్‌ మంగళవారం ట్విటర్‌లో తెలిపారు. దిల్లీ, పంజాబ్‌లలో అధికారంలో ఉన్న ఆమ్‌ ఆద్మీ పార్టీకి ఇప్పటికే అక్కడ రాష్ట్ర పార్టీ హోదా ఉంది. తాము మరొక్క రాష్ట్రంలో రాష్ట్ర పార్టీ హోదా పొందితే జాతీయ పార్టీగా గుర్తింపు లభిస్తుందని కేజ్రీవాల్‌ చెప్పారు. ఈ ఏడాది గోవా రాష్ట్ర అసెంబ్లీ ఎన్నికల్లో ఆమ్‌ ఆద్మీ పార్టీకి రెండు సీట్లు, 6.77 శాతం ఓట్లు లభించాయి. పంజాబ్‌లోని 117 అసెంబ్లీ సీట్లకు 92 గెలుచుకుని 42.01 శాతం ఓట్లు సాధించింది.