రేవంత్‌రెడ్డి నోరు అదుపులో పెట్టుకోవాలి: తమ్మినేని

ఈనాడు, హైదరాబాద్‌: విధానాలే ప్రాతిపదికగా పని చేస్తున్న కమ్యూనిస్టులపై పీసీసీ అధ్యక్షుడు రేవంత్‌రెడ్డి చెత్తవాగుడు మానుకోవాలని సీపీఎం రాష్ట్ర కార్యదర్శి తమ్మినేని వీరభద్రం సూచించారు. నోరు అదుపులో పెట్టుకోవాలని ఆయనకు హెచ్చరించారు. భాజపా ప్రమాదాన్ని గుర్తించి కమ్యూనిస్టులపై రేవంత్‌రెడ్డి బురద చల్లడం మానుకోవాలన్నారు. తెరాస అధినేతకు అమ్ముడుపోయారంటూ ఆయన నోరు పారేసుకోవడాన్ని తీవ్రంగా ఖండించారు. మునుగోడు ఉప ఎన్నికలో మతోన్మాద భాజపాని ఓడించాలనే లక్ష్యంతో కమ్యూనిస్టు పార్టీలు ముందుకు వెళ్తున్నాయని పేర్కొన్నారు. భాజపాను నిలువరించడం, ఓడించడం ప్రధాన లక్ష్యంగా ఎంచుకోకుండా తెరాసను లక్ష్యంగా చేసుకోవడం కాంగ్రెస్‌ పార్టీకే నష్టమని వీరభద్రం తెలిపారు.