కాంగ్రెస్‌ది బానిస మనస్తత్వం

ప్రధాని మోదీ విమర్శ

అహ్మదాబాద్‌: మంచి పనులను అడ్డుకోవడం, జాప్యం చేయడం, ప్రజల్ని తప్పుదోవ పట్టించడం మాత్రమే కాంగ్రెస్‌కు తెలుసని ప్రధాని మోదీ విమర్శించారు. వాటినే ఆ పార్టీ విశ్వసిస్తుందని పేర్కొన్నారు. గుజరాత్‌ ఎన్నికల ప్రచారంలో భాగంగా శుక్రవారం బనాస్‌కాంఠా జిల్లాలోని కాంక్రేజ్‌ గ్రామం, ఉత్తర గుజరాత్‌లోని పాటణ్‌ పట్టణం, ఆణంద్‌ జిల్లాలోని సొజిత్రా నగరంలో నిర్వహించిన ర్యాలీల్లో మోదీ ప్రసంగించారు. కాంగ్రెస్‌ను లక్ష్యంగా  విమర్శల వర్షం కురిపించారు. ఆ పార్టీ బానిస మనస్తత్వాన్ని కలిగి ఉందని పేర్కొన్నారు. స్వాతంత్య్రానికి పూర్వం బ్రిటిష్‌వారితో కలిసి ఏళ్లపాటు పనిచేసి ఉండటం వల్ల ఆ లక్షణం అబ్బి ఉండొచ్చంటూ ఎద్దేవా చేశారు.

ముగిసిన మోదీ ప్రచారం : గుజరాత్‌ ఎన్నికలకు సంబంధించి తన ప్రచార కార్యకలాపాలను ప్రధాని మోదీ శుక్రవారంతో ముగించారు. రాష్ట్రంలో ఈ దఫా మొత్తంగా ఆయన 31 ర్యాలీల్లో ప్రసంగించారు. 3 భారీ రోడ్‌షోలను నిర్వహించారు.