Janasena: జగన్‌ సీఎం అయ్యాక అసలు రంగు బయటపడింది: జానీ మాస్టర్‌

నెల్లూరు: జగన్‌ ప్రభుత్వంలో పేదల సొంతింటి కల..కలగానే మిగిలిపోయిందని జనసేన నేత, ప్రముఖ కొరియోగ్రాఫర్‌ జానీ మాస్టర్‌ విమర్శించారు. నెల్లూరులోని టిడ్కో ఇళ్ల వద్ద జనసేన కార్యకర్తలు మహాధర్నా నిర్వహించారు. ఆందోళనలో పాల్గొన్న జానీ మాస్టర్ మాట్లాడుతూ... రూపాయికే ఇల్లు అని లబ్ధిదారులకు శఠగోపం పెట్టారని విమర్శించారు. టిడ్కో ఇళ్లన్నీ అసాంఘిక కార్యకలాపాలకు నిలయంగా మారాయన్నారు.

గత ప్రభుత్వంలో నిర్మించిన వాటిని లబ్ధిదారులకు ఇచ్చి ఉంటే.. వారికి అద్దె ఇళ్లలో అవస్థలు తప్పేవన్నారు. అధికారంలోకి వస్తే రూపాయికే ఇల్లు ఇస్తామన్న జగన్‌.. సీఎం అయ్యాక పూర్తిగా రివర్స్‌ అయ్యారని మండిపడ్డారు. రంగులు మార్చి.. తన అసలు రంగు బయటపెట్టారని ధ్వజమెత్తారు. ఇళ్లు ఇప్పించండి మహా ప్రభో అని మొరపెట్టుకున్నా.. సిటీ ఎమ్మెల్యే అనిల్‌ కుమార్‌ పట్టించుకోలేదన్నారు. ఆయన గ్రాఫ్‌ పడిపోవడంతో పక్క జిల్లాకు పంపేశారని ఎద్దేవా చేశారు. రాష్ట్రంలో పేదల కోసం కట్టించిన లక్ష గృహాలు వారికి ఇవ్వకపోవడం అన్యాయమన్నారు. టిడ్కో ఇళ్లు ఇచ్చే వరకు పోరాడతానని లబ్ధిదారులకు హామీ ఇచ్చారు.