Yogi Adityanath: కోటిమంది యువతకు స్మార్ట్‌ ఫోన్స్‌, ట్యాబ్స్‌

డిజిటల్ సాధికారత పేరిట విద్యార్థులకు యోగి ఎన్నికల హామీ

లఖ్‌నవూ: ఉత్తర్‌ప్రదేశ్‌లో మరోసారి పాగా వేసేందుకు యోగి ఆదిత్యనాథ్‌ ప్రభుత్వం పావులు కదుపుతోంది. అందుకు తగ్గట్టే యువతను ఆకట్టుకునేందుకు ఉచితాల జల్లును కురింపించింది. డిజిటల్ సాధికారత పేరిట.. కోటిమంది యువతకు స్మార్ట్‌ ఫోన్స్‌, ట్యాబ్స్‌ ఇవ్వనున్నట్లు హామీ ఇచ్చింది. బుధవారం అసెంబ్లీలో అనుబంధ బడ్జెట్‌ను ప్రవేశపెట్టిన సందర్భంగా ఆదిత్యనాథ్ ఈ ప్రకటన చేశారు. ఈ పథకం కోసం సుమారు రూ.3వేల కోట్లు వెచ్చించనున్నారు.

‘ఈ పథకం కింద కోటి మంది విద్యార్థుల్ని ఎంపిక చేస్తాము. గ్రాడ్యుయేషన్, పోస్టు గ్రాడ్యుయేషన్, టెక్నికల్, డిప్లొమా కోర్సులు చదివే విద్యార్థులకు స్మార్ట్‌ ఫోన్స్, ట్యాబ్స్‌ అందించనున్నాం. అలాగే పోటీ పరీక్షలకు సిద్ధమయ్యే అభ్యర్థులకు సన్నాహక భత్యం ఇచ్చి సహకరిస్తాం’ అని యోగి వెల్లడించారు. గరిష్ఠంగా మూడు పరీక్షల కోసం ఈ భత్యాన్ని అందజేయనున్నట్లు వివరించారు. 

గతంలో సమాజ్‌వాదీ పార్టీ కూడా ఈ తరహా హామీలు ఇచ్చి అధికారంలోకి వచ్చింది. 12వ తరగతి పాస్ అయిన విద్యార్థులకు ల్యాప్‌టాప్‌లు ఇస్తామని ప్రకటించింది. 2012లో ఆ పార్టీ విజయంలో ఈ హామీ కీలక పాత్ర పోషించింది. కొద్ది నెలల్లో జరగనున్న అసెంబ్లీ ఎన్నికల్లో యువ ఓటర్లను ఆకర్షించేందుకు యోగి ప్రకటన దోహదపడుతుందని భాజపా వర్గాలు భావిస్తున్నాయి. విపక్షాలు మాత్రం ఇది మరో తప్పుడు వాగ్దానం అంటూ విమర్శలు గుప్పిస్తున్నాయి.