రైతు భరోసా కేంద్రాలు.. దళారుల నిలయాలు

జనసేన నేత నాదెండ్ల మనోహర్‌

ఈనాడు డిజిటల్‌, అమరావతి: రాష్ట్రంలో రైతు భరోసా కేంద్రాలు దళారులకు నిలయాలుగా మారాయని జనసేన రాజకీయ వ్యవహారాల కమిటీ ఛైర్మన్‌ నాదెండ్ల మనోహర్‌ ఆరోపించారు. ధాన్యం కొనుగోలులో అక్రమాలపై పోరాడతామని గురువారం ఓ ప్రకటనలో పేర్కొన్నారు. ‘రైతుల నుంచి బస్తాకు రూ.200 దోచుకుంటున్నా సీబీఐ దత్తపుత్రుడికి చలనం రావడం లేదు. దీన్ని బట్టే ఈ దోపిడీకి సూత్రధారులెవరో అర్థమవుతోంది. ఆర్బీకేల్లో ధాన్యం అమ్మడానికి వెళుతున్న రైతుల ఆధార్‌ వివరాలు నమోదు చేయకుండా మిల్లర్లు, ఆర్బీకేల నిర్వాహకులు, పౌరసరఫరాల శాఖ చేస్తున్న మాయతో రైతులు మోసపోతున్నారు. రైతుల చిరునామాలు గల్లంతు చేసిన కుంభకోణంపై వైకాపా ఎంపీ.. కలెక్టర్‌ దృష్టికి తీసుకెళ్లినా ప్రభుత్వంలో చలనం లేదు’ అని పేర్కొన్నారు.