యూరో వినియోగ దేశాల్లో ధరల మంట

రికార్డు స్థాయిలో 8.6% ద్రవ్యోల్బణం

లండన్‌: యూరోను వినియోగిస్తున్న 19 యూరోపియన్‌ దేశాల్లో ద్రవ్యోల్బణం జూన్‌లో రికార్డుస్థాయిలో 8.6%గా నమోదైంది. ఈ ఒక్క నెలలోనే ఇంధన ధరలు 41.9%... ఆహారం, మద్యం, పొగాకు ఉత్పత్తుల ధరలు 8.9%, దుస్తులు, కార్లు, కంప్యూటర్లు, పుస్తకాలు వంటి వస్తువుల ధరలు 4.3%, సేవా రుసుములు 3.4% మేర పెరిగాయి. ఉక్రెయిన్‌పై రష్యా యుద్ధం, ఈ క్రమంలో చోటుచేసుకున్న పరిణామాల కారణంగానే ఇంధన ధరలు విపరీతంగా ఎగబాకాయి. ఫలితంగా ఆహారోత్పత్తుల ధరలకూ రెక్కలు వచ్చాయి. యూరోను వినియోగిస్తున్న దేశాల్లో ద్రవ్యోల్బణం మే నెలలో 8.1% కాగా, జూన్‌లో అది రికార్డుస్థాయిలో 8.6%గా నమోదైనట్టు యూరోపియన్‌ యూనియన్‌ స్టాటస్టిక్స్‌ ఏజెన్సీ ‘యూరోస్టాట్‌’ పేర్కొంది. యూరో వినియోగం ఆరంభమైన తర్వాత ఈ స్థాయిలో ద్రవ్యోల్బణం నమోదు కావడం ఇదే తొలిసారి అని వివరించింది.