రష్యా, జర్మనీ చనిపోయారు.. అమెరికా, ఆఫ్రికా, జపాన్‌ మిగిలారు!

మీరు చదివిన శీర్షిక కరెక్టే. వీరంతా అన్నదమ్ములు. బిహార్‌ రాష్ట్రం పశ్చిమ చంపారన్‌ జిల్లాలోని జమాదర్‌ తోలా గ్రామానికి వెళితే.. చనిపోయిన సోదరులు రష్యా, జర్మనీల జ్ఞాపకాలతో జీవిస్తున్న అమెరికా, ఆఫ్రికా, జపాన్‌లను చూడవచ్చు. రెండో ప్రపంచయుద్ధం అనంతరం జమాదర్‌ తోలా గ్రామస్థుడైన అకుల్‌ శర్మ భారత సైన్యంలో చేరారు. యుద్ధంలో శత్రువుల తూటాలు ఆయన భుజంలోకి దిగాయి. ఇంటికి వచ్చి చికిత్స చేయించుకుంటున్న సమయంలోనే సోదరునికి కుమారుడు పుట్టాడు. ఆ బిడ్డకు అకుల్‌ కోరిక మేరకు ‘అమెరికా’ అని పేరు పెట్టారు. ఆ ఇంట.. ఆ తర్వాత పుట్టినవారికి కూడా అదే వరుసలో ఆఫ్రికా, జర్మనీ, రష్యా, జపాన్‌లుగా నామకరణం చేశారు. అందరం కమ్మరి వృత్తి చేస్తామని జపాన్‌ శర్మ తెలిపారు. 2017లో జర్మనీ శర్మ, అంతకుముందు 2012లో రష్యా శర్మ మృతిచెందారు. సోదరులను తలచుకొంటూ మిగతా ముగ్గురం ఎంతో ప్రేమగా బతుకుతున్నామని జపాన్‌ శర్మ చెప్పారు.

ఓ సందర్భంలో పొరుగువారితో గొడవపడ్డారు. వీరిపై కేసు పెట్టాలని ప్రత్యర్థులు ఠాణాకు వెళితే.. శక్తిమంతమైన దేశాల పేర్లు పెట్టుకున్న తమపై కేసు పెట్టలేమని పోలీసులు చెప్పినట్లు వెల్లడించారు. రష్యా - ఉక్రెయిన్‌ల మధ్య ఇపుడు జరుగుతున్న యుద్ధంపై వీరు ఆందోళన వ్యక్తం చేస్తున్నారు. తమలాగే సోదరభావంతో ఆ దేశాలు మెలగాలని కోరుతున్నారు.