వైభవంగా పెంపుడు శునకాల వివాహం

డీజే పాటలతో బరాత్‌.. ప్రత్యేక విందు

కొత్త వస్త్రాలు కట్టుకుని టోపీ పెట్టుకుని వరుడు కొల్హు రాగా.. వధువు వాసంతి కొత్త బట్టలతో పెళ్లి పందిట్లోకి విచ్చేసింది. వీరిద్దరి వివాహం హిందూ సంప్రదాయాల ప్రకారం పెళ్లిపందిరి కింద వేద మంత్రాలతో అంగరంగ వైభవంగా జరిగింది. అతిథులకు రకరకాల వంటలతో నోరూరించే భోజనాలు సైతం వడ్డించారు. ఇందులో వింత ఏముంది అనుకుంటున్నారా? ఈ పెళ్లి జరిగింది మనుషులకు కాదు. రెండు పెంపుడు శునకాలకు. బిహార్‌లోని తూర్పు చంపారణ్‌ జిల్లా మోతిహారీలో ఓ అరుదైన వివాహం జరిగింది. మజుర్హాన్‌ గ్రామానికి చెందిన నరేశ్‌ సాహ్నీ, సవితా దేవి దంపతులు తమ పెంపుడు శునకాలకు ఘనంగా వివాహం చేశారు. పండితులు మంత్రాలు చదువుతుండగా.. సహాయకులతో కలిసి వేడుకను నిర్వహించారు. వివాహం అనంతరం శునకాలను గ్రామమంతా ఊరేగించారు. డీజే పాటలకు నృత్యాలు చేశారు. ఈ పెళ్లికి నాలుగు వందల మందికిపైగా ప్రజలు హాజరయ్యారు. వారందరికీ భోజనాలు సైతం పెట్టారు. మరోవైపు, ఇలాంటి పెళ్లిని ఇప్పటివరకు తాము చూడలేదని గ్రామస్థులు, పెళ్లికి వచ్చినవారు ఆశ్చర్యం వ్యక్తం చేశారు.