ఒక్కటైన బజరంగ్‌ పునియా, సంగీతా ఫోగట్‌

(ఫొటో సోర్స్‌ : బజరంగ్‌ పునియా ట్విటర్‌)

దిల్లీ: భారత్‌కు చెందిన రెజ్లర్లు బజరంగ్‌ పునియా, సంగీతా ఫోగట్‌లు వివాహబంధంతో ఒక్కటయ్యారు. గురువారం జరిగిన వీరి వివాహానికి సంబంధించిన చిత్రాలను వారిద్దరూ సామాజిక మాధ్యమాల్లో పంచుకున్నారు. ఈ సందర్భంగా ప్రముఖ బాడ్మింటన్‌ క్రీడాకారిణి సైనా నెహ్వాల్‌, హాకీ క్రీడాకారిణి రాణీ రాంపాల్‌తో సహా పలువురు ఆ జంటకు శుభాకాంక్షలు తెలిపారు.

ఈ సందర్భంగా పునియా తన పాపిట్లో సిందూరం అద్దుతున్న చిత్రాన్ని సంగీతా ఫోగట్‌ షేర్‌ చేశారు. ‘‘నీ వల్ల నా జీవితం పరిపూర్ణమైంది. నువ్వే నా ఆత్మబంధువు.  నా జీవితంలో ఈ కొత్త అధ్యాయం ప్రేమ, సంతోషాలతో నిండి ఉంటుంది.’’ అనే వ్యాఖ్యను దానికి జోడించారు. తాము వివాహం చేసుకోవాలనుకుంటున్నట్టు ఈ జంట 2019లో ప్రకటించిన సంగతి తెలిసిందే.