ఆఖరి మెట్టుపై బోల్తా

దక్షిణాఫ్రికా చేతిలో భారత్‌ ఓటమి
మహిళల ముక్కోణపు టీ20 సిరీస్‌

ఈస్ట్‌ లండన్‌: మహిళల ముక్కోణపు టీ20 సిరీస్‌లో భారత్‌ ఆఖరి మెట్టుపై బోల్తా పడింది. బ్యాటింగ్‌ వైఫల్యంతో ఫైనల్లో దక్షిణాఫ్రికా చేతిలో 5 వికెట్ల తేడాతో ఓడింది. మందకొడి పిచ్‌పై తడబడిన భారత్‌ మొదట    4 వికెట్లకు 109 పరుగులే చేసింది. రెండో ఓవర్లోనే స్టార్‌ బ్యాటర్‌ స్మృతి మంధాన (0) వికెట్‌ కోల్పోయిన టీమ్‌ఇండియా.. 4 ఓవర్లకు 3 పరుగులే చేసింది. ఈ స్థితిలో హర్లీన్‌ డియోల్‌ (46; 56 బంతుల్లో 4×4) జట్టును ఆదుకుంది. ఆమెకు కెప్టెన్‌ హర్మన్‌ప్రీత్‌ కౌర్‌ (21), దీప్తిశర్మ (16 నాటౌట్‌) అండగా నిలవడంతో భారత్‌ స్కోరు వంద దాటింది. మాల్బా (2/16), కాకా (1/17), సన్‌ లజ్‌ (1/22) భారత్‌ను కట్టడి చేశారు. ఛేదనలో దక్షిణాఫ్రికా కూడా 6.3 ఓవర్లలో 21/3తో తడబడింది. కానీ క్లోయి ట్రయాన్‌ (57 నాటౌట్‌; 32 బంతుల్లో 6×4, 2×6) మెరుపులతో సఫారీలకు ఎక్కువ ఆందోళన చెందాల్సిన అవసరం లేకపోయింది. ఒంటిచేత్తో ఇన్నింగ్స్‌ను నడిపించిన ట్రయాన్‌.. డిక్లెర్క్‌ (17 నాటౌట్‌)తో కలిసి జట్టును విజయతీరాలకు చేర్చింది. దక్షిణాఫ్రికా 18 ఓవర్లలో 5 వికెట్లు కోల్పోయి లక్ష్యాన్ని అందుకుంది.