ఫైనల్లో ధీరజ్‌ బృందం

ఆర్చరీ ప్రపంచకప్‌

షాంగై: ఆర్చరీ ప్రపంచకప్‌ స్టేజ్‌-1 టోర్నీలో భారత పురుషుల రికర్వ్‌ జట్టు సత్తా చాటింది. తెలుగుతేజం బొమ్మదేవర ధీరజ్‌, తరుణ్‌దీప్‌ రాయ్‌, ప్రవీణ్‌ జాదవ్‌లతో కూడిన బృందం పసిడి పోరుకు అర్హత సాధించింది. గురువారం సెమీస్‌లో భారత్‌ 5-1తో ఇటలీని ఓడించింది. స్వర్ణంతో కోసం బలమైన దక్షిణ కొరియాతో అమీతుమీ తేల్చుకోనుంది. రికర్వ్‌ మహిళల టీమ్‌ విభాగంలో భారత్‌ (దీపిక కుమారి, అంకిత బాకత్‌, భజన్‌కౌర్‌) నిరాశ పరిచింది. తొలి రౌండ్లో 3-5తో మెక్సికో చేతిలో ఓడింది. కాంపౌండ్‌ మహిళల సింగిల్స్‌లో తెలుగమ్మాయి జ్యోతి సురేఖ సెమీస్‌ చేరింది. క్వార్టర్స్‌లో ఆమె 143-142తో సహచర ఆర్చర్‌ అవ్‌నీత్‌ కౌర్‌ను ఓడించింది. టీమ్‌ ఈవెంట్లో జ్యోతి బృందం ఫైనల్‌ చేరిన సంగతి తెలిసిందే. మరోవైపు అదితి 142-144తో ఆండ్రియా (ఇటలీ) చేతిలో పరాజయం చవిచూసింది. పురుషుల సింగిల్స్‌లో ప్రియాంశు సెమీస్‌లో అడుగుపెట్టాడు. క్వార్టర్స్‌లో అతడు 145-145తో బతుహాన్‌ (టర్కీ)తో సమంగా నిలిచాడు. కానీ షూటాఫ్‌లో ప్రత్యర్థిపై పైచేయి సాధించాడు. ఇంకోవైపు ప్రథమేశ్‌ 147-148తో కాపెర్స్‌ (అమెరికా) చేతిలో ఓడాడు.