రుద్రాంక్ష్‌కు మరో పతకం

భోపాల్‌: ప్రపంచకప్‌ షూటింగ్‌లో మరో పతకం భారత్‌ సొంతమైంది. ఎయిర్‌రైఫిల్‌ మిక్స్‌డ్‌ టీమ్‌లో ఇప్పటికే కాంస్యం గెలిచిన రుద్రాంక్ష్ పాటిల్‌.. వ్యక్తిగత విభాగంలోనూ కంచు కైవసం చేసుకున్నాడు. క్వాలిఫికేషన్‌ రౌండ్‌ ఆరంభంలో ఆధిక్యంలో నిలిచిన రుద్రాంక్ష్.. చివరికి 631 పాయింట్లతో నాలుగో స్థానం సాధించి ఎనిమిది మంది పోటీపడే ర్యాంకింగ్‌ రౌండ్‌కు అర్హత సాధించాడు. ర్యాంకింగ్‌ రౌండ్లో స్థిరంగా రాణించిన రుద్రాంక్ష్.. తొలి రెండు స్థానాల్లో నిలిచిన చైనా షూటర్లు సెహెంగ్‌, లిన్‌షూలకు గట్టిపోటీ ఇచ్చాడు. కానీ కాంస్యంతో సరిపెట్టుకున్నాడు. మహిళల 10 మీటర్ల ఎయిర్‌ రైఫిల్‌లో రమితకు అదృష్టం కలిసి రాలేదు. 52 మంది పోటీపడిన ఈవెంట్లో క్వాలిఫికేషన్లో 632.8తో రెండో స్థానంలో నిలిచిన భారత షూటర్‌.. ర్యాంకింగ్‌ రౌండ్లో 260.5 పాయింట్లతో నాలుగో స్థానం సాధించి కొద్దిలో పతకానికి దూరమైంది. ఈ విభాగంలో హంగ్‌ యుటింగ్‌ (చైనా) స్వర్ణం గెలవగా.. టకర్‌ మేరీ (అమెరికా), అలెగ్జాండ్రా లీ (కజకిస్థాన్‌) కాంస్యం నెగ్గారు.