లంకకు కష్టమే కానీ..

ఎవరి సత్తాఎంత?

వరుసగా 13 వన్డేవిజయాలు.. 2022 ఆసియాకప్‌లో టైటిల్‌ కైవసం.. 2023లో రన్నరప్‌! శ్రీలంక జోరు ఇది. అయితే ప్రపంచకప్‌లో మహామహా జట్లతో పోలిస్తే లంకను బలమైందిగా ఎంచలేం! అలా అని ఉపఖండ పరిస్థితుల్లో సత్తా చాటే ఈ జట్టును తీసి పారేయలేం. అందుకే భారత్‌ వేదికగా జరుగుతున్న వన్డే ప్రపంచకప్‌లో శానక సారథ్యంలోని లంక ఓ డార్క్‌హార్స్‌. క్వాలిఫయింగ్‌ ద్వారా ఈ టోర్నీకి అర్హత సాధించిన ఈ జట్టు కప్‌లో అద్భుతాలు చేస్తుందో లేదో తెలియదు కానీ కొన్ని కీలక విజయాలు సాధించగలదు. అక్టోబర్‌ 7న దక్షిణాఫ్రికాతో మ్యాచ్‌తో లంక కప్‌ వేటను ఆరంభించనుంది.

భారత్‌తో ఆసియాకప్‌ ఫైనల్లో 50 పరుగులకు ఆలౌట్‌ కావడం మినహాయిస్తే లంక మంచి ఫామ్‌లోనే ఉంది. వేగంగా కుదురుకుంటున్న ఆ జట్టులో యువ ఆటగాళ్లు సమష్టిగా సత్తా చాటుతున్నారు. ఏమాత్రం అంచనాలు లేకుండా 2022 ఆసియాకప్‌ గెలవడం.. ఈసారి ఆసియాకప్‌లో రన్నరప్‌గా నిలవడం ఆ జట్టు ఎదుగుదలకు నిదర్శనం. స్టార్లు లేకపోయినా పట్టుదలగా ఆడుతూ విజయాలు సాధిస్తున్న లంక.. క్వాలిఫికేషన్‌ టోర్నీలో ఒక్క మ్యాచ్‌ ఓడిపోకుండా విజేతగా నిలిచి సత్తా చాటింది. శానక కెప్టెన్సీలో ఈ జట్టు 39 వన్డేల్లో 23 గెలిచింది. ఈ జోరు ప్రపంచకప్‌లోనూ ప్రదర్శిస్తుందా అన్నదే ఆసక్తికరం.

ఇదీ బలం: లంక జట్టుకు ప్రధాన బలం స్పిన్‌ బౌలింగే. స్పిన్నర్‌ హసరంగ, తీక్షణ ఆ జట్టు ప్రధాన స్పిన్‌ అస్త్రాలు. కొత్తగా వెల్లలాగె రూపంలో లంకకు కొత్త ఆయుధం వచ్చింది. ఇటీవల ఆ జట్టు సాధించిన విజయాల్లో స్పిన్నర్ల పాత్రే కీలకం. ప్రధాన స్పిన్నర్లకు తోడు అసలంక, ధనంజయ డిసిల్వా సైతం అప్పుడప్పుడూ సత్తా చాటుతున్నారు. ప్రపంచకప్‌ జరిగేది భారత్‌లో కావడం బలమైన స్పిన్‌ దళం ఉన్న లంకకు ప్లస్‌. పేసర్‌ పతిరనతో బ్యాటర్లకు ఎప్పుడూ ముప్పు పొంచి ఉంటుంది. బ్యాటింగ్‌నూ లంక పర్వాలేదు. కుశాల్‌ మెండిస్‌ జట్టుకు వెన్నెముక. అసలంక, శానక, ధనంజయ, సమరవిక్రమ లాంటి ప్రతిభావంతులు అందుబాటులో ఉన్నారు. శానక సహా జట్టులో ఎక్కువమంది ఆల్‌రౌండర్లు ఉండటం లంకకు కలిసొచ్చే అంశం.

ఇదీ బలహీనత: బౌలింగ్‌ బాగున్నా బ్యాటింగ్‌లో తడబాటు లంకకు ప్రతికూలత. భారత్‌తో ఆసియాకప్‌ ఫైనలే ఇందుకు ఉదాహరణ. స్పిన్‌ బాగా ఆడుతున్నా.. పేస్‌కు అనుకూలించే పిచ్‌పై తడబడడం బలహీనతగా మారింది. ముఖ్యంగా కుశాల్‌ మెండిస్‌కు మద్దతు కరవవుతోంది. ఒక మంచి భాగస్వామ్యం నెలకొల్పాక.. వెంటనే తడబడి కుప్పకూలడం లంకకు అలవాటుగా మారింది. శానక, ధనంజయ ఇటీవల బ్యాటింగ్‌లో సరైన ఫామ్‌లో లేరు. హసరంగ ఫిట్‌నెస్‌ కొంత ఆందోళన రేకెత్తిస్తోంది.  ప్రస్తుత జట్టులో ప్రపంచకప్‌ లాంటి పెద్ద టోర్నీలో ఆడిన అనుభవం ఉన్న ఆటగాళ్లు తక్కువగా ఉండడం కూడా మరో ప్రతికూలాంశం.

ఉత్తమ ప్రదర్శన: 1996లో విజేత

వీళ్లు కీలకం: హసరంగ, కుశాల్‌ మెండిస్‌, పతిరన, శానక.

జట్టు: శానక (కెప్టెన్‌), నిశాంక, దుమిత్‌ కరుణరత్నె, కుశాల్‌ పెరీరా, కుశాల్‌ మెండిస్‌ (వైస్‌ కెప్టెన్‌), అసలంక, ధనంజయ, సమరవిక్రమ, తీక్షణ, హసరంగ, పతిరన, రజిత, చమీర, మదుశంక, లహిరు కుమార.