భారత అమ్మాయిలదే సిరీస్‌

మూడో టీ20లో బంగ్లాపై విజయం

సిల్‌హట్‌: బంగ్లాదేశ్‌తో టీ20 సిరీస్‌లో భారత అమ్మాయిలు దూకుడు కొనసాగిస్తున్నారు. మరో రెండు మ్యాచ్‌లు మిగిలి ఉండగానే అయిదు టీ20ల సిరీస్‌ను 3-0తో కైవసం చేసుకున్నారు. గురువారం మూడో టీ20లో టీమ్‌ఇండియా 7 వికెట్ల తేడాతో ఆతిథ్య జట్టును చిత్తుచేసింది. మొదట బౌలర్లు కట్టుదిట్టంగా బౌలింగ్‌ చేయడంతో బంగ్లా 20 ఓవర్లలో 8 వికెట్లకు 117 పరుగులే చేయగలిగింది. ఓపెనర్‌ దిలారా అక్తర్‌ (39; 27 బంతుల్లో 5×4) టాప్‌స్కోరర్‌. రాధ యాదవ్‌ (2/22) రెండు వికెట్లతో మెరిసింది. ఇన్నింగ్స్‌ను బంగ్లా మెరుగ్గానే ఆరంభించింది. ఒక్క వికెట్టూ కోల్పోకుండా పవర్‌ప్లేలో 44 పరుగులు చేసింది. కానీ ఆ తర్వాతి ఓవర్లో ముర్షీద (9) రనౌట్‌తో పోటీలోకి వచ్చిన భారత్‌ పట్టుబిగించింది. రేణుక, పూజ, శ్రేయాంక తలో వికెట్‌ తీశారు. ఛేదనలో ‘‘ప్లేయర్‌ ఆఫ్‌ ద మ్యాచ్‌’’ షెఫాలి వర్మ (51; 38 బంతుల్లో 8×4), స్మృతి మంధాన (47; 42 బంతుల్లో 5×4, 1×6) చెలరే గడంతో భారత్‌ మూడు వికెట్లు కోల్పోయి 18.3 ఓవర్లలో లక్ష్యాన్ని చేరుకుంది. ఈ ఓపెనింగ్‌ జోడీ తొలి వికెట్‌కు 91 పరుగులు జోడించి జట్టు విజయాన్ని ఖాయం చేసింది. ముఖ్యంగా షెఫాలి ధనాధన్‌ షాట్లతో సాగిపోయింది. మంధాన కూడా ఫామ్‌ అందుకోవడంతో భారత్‌ గెలుపు నల్లేరుపై నడకే అయింది.