సెమీస్‌లో నలుగురు భారత బాక్సర్లు

అస్తానా (కజకిస్థాన్‌): ఆసియా అండర్‌-22, యూత్‌ బాక్సింగ్‌ ఛాంపియన్‌షిప్‌లో నలుగురు భారత బాక్సర్లు సెమీఫైనల్‌కు దూసుకెళ్లారు. గురువారం అండర్‌-22 విభాగంలో జాదుమణి (51 కేజీలు), నిఖిల్‌ (57 కేజీలు), అజయ్‌  (63.5 కేజీలు), అంకుశ్‌ (71 కేజీలు) తుది నాలుగులో చోటు దక్కించుకుని పతకం ఖాయం చేశారు. క్వార్టర్స్‌లో జాదుమణి 5-0తో కిన్లే (భూటాన్‌)ను చిత్తు చేయగా... నిఖిల్‌ 4-0తో అయుబకోన్‌ (ఉజ్బెకిస్థాన్‌)ను ఓడించాడు. డామ్‌దిన్‌దోర్‌ (మంగోలియా)పై అజయ్‌.. లీ సాంగ్‌ (కొరియా)పై అంకుశ్‌ నెగ్గారు. ఈ రెండు బౌట్లలో రిఫరీ బౌట్‌ను ఆపేసి భారత బాక్సర్లను విజేతగా ప్రకటించాడు. 54 కేజీల విభాగంలో ఆశిష్‌ 2-3తో ఒయున్‌ (మంగోలియా) చేతిలో ఓడిపోయాడు. బుధవారం రాత్రి జరిగిన యూత్‌ విభాగం క్వార్టర్స్‌లో ఆర్యన్‌ (92 కేజీ), నిషా (52 కేజీ), ఆకాంశ (70 కేజీ), రుద్రిక (70 కేజీ) గెలిచి పతకాలు ఖరారు చేశారు.