భారత్‌కు షాక్‌

థామస్‌ కప్‌లో క్వార్టర్స్‌లోనే ఔట్‌
ఉబర్‌ కప్‌లోనూ నిరాశే
చెంగ్డూ

రెండేళ్ల కిందట.. ప్రపంచ పురుషుల టీమ్‌ ఛాంపియన్‌షిప్‌గా పరిగణించే థామస్‌ కప్‌లో భారత్‌ అద్భుత విజయం సాధించింది. మొట్టమొదటి సారి ఈ టైటిల్‌ను దక్కించుకుని చరిత్ర సృష్టించింది. కానీ ఈ సారి ఎన్నో అంచనాలతో డిఫెండింగ్‌ ఛాంపియన్‌గా బరిలో దిగిన భారత్‌కు షాక్‌ తగిలింది. బుధవారం గ్రూప్‌ దశ చివరి మ్యాచ్‌లో ఇండోనేషియా చేతిలో ఓడిన పురుష షట్లర్లు.. ఆ ఓటమి నుంచి పుంజుకోలేకపోయారు. గురువారం కీలకమైన క్వార్టర్స్‌లో భారత్‌ 1-3 తేడాతో చైనా చేతిలో పరాజయం పాలైంది. ఇండోనేషియాతో మ్యాచ్‌లో పోరాడి అలసిపోయిన భారత ఆటగాళ్లు.. ఒక్క రోజు కూడా గడవకముందే ఆతిథ్య చైనాతో తలపడాల్సి రావడం చేటు చేసిందనే చెప్పాలి. తొలి సింగిల్స్‌లో ప్రపంచ 9వ ర్యాంకర్‌ హెచ్‌ఎస్‌ ప్రణయ్‌ 21-15, 11-21, 14-21తో రెండో ర్యాంకర్‌ షి యు కి చేతిలో ఓడాడు. డబుల్స్‌లో సాత్విక్‌- చిరాగ్‌ జంట 15-21, 21-11, 12-21తో ప్రపంచ నంబర్‌వన్‌ లియాంగ్‌- వాంగ్‌ జోడీపై గెలవలేకపోయింది. భారత్‌ 0-2తో వెనుకబడ్డ దశలో లక్ష్యసేన్‌ 13-21, 21-8, 21-14తో ఫెంగ్‌పై నెగ్గి ఆశలు నిలిపాడు. కానీ వెంటనే మరో డబుల్స్‌లో ధ్రువ్‌- సాయి ద్వయం 10-21, 10-21తో జియాంగ్‌- టింగ్‌ చేతిలో పరాజయం చెందడంతో భారత్‌ కథ ముగిసింది. మరోవైపు స్టార్‌ షట్లర్‌ పీవీ సింధు గైర్హాజరీతో ద్వితీయ శ్రేణి జట్టుగా ఉబర్‌ కప్‌లో అడుగుపెట్టిన మహిళల జట్టు పోరాటానికి తెరపడింది. క్వార్టర్స్‌లో భారత్‌ 0-3 తేడాతో బలమైన జపాన్‌ చేతిలో చిత్తయింది. తొలి సింగిల్స్‌లో ప్రపంచ 53వ ర్యాంకర్‌ అస్మిత 10-21, 22-20, 15-21తో 11వ ర్యాంకర్‌ ఒహోరి చేతిలో పోరాడి ఓడింది. డబుల్స్‌లో ప్రియ- శ్రుతి జోడీ 8-21, 9-21తో మత్సుయామ- చిహారు చేతిలో, మరో సింగిల్స్‌ మ్యాచ్‌లో ఇషారాణి 15-21, 12-21తో నజోమి ఒకుహర చేతిలో పరాజయం చెందారు.