పేద చిన్నారుల కోసం బోపన్న

దిల్లీ: భారత అగ్రశ్రేణి టెన్నిస్‌ ఆటగాడు రోహన్‌ బోపన్న ఓ బృహత్తర కార్యక్రమానికి శ్రీకారం చుట్టాడు. వెనుకబడిన వర్గాలకు చెందిన పిల్లలకు శిక్షణ అందించేందుకు సిద్ధమయ్యాడు. కమల్‌ ఇండియా ఫౌండేషన్‌ యూకేతో కలిసి రోహన్‌ బోపన్న టెన్నిస్‌ అకాడమీ (ఆర్బీటీఏ) ఈ శిక్షణ ఇవ్వనుంది. అస్సాంలోని మజూలి ద్వీపం, బొంగాయ్‌గాన్‌లోని మారుమూల ప్రాంతాలకు చెందిన 25 మంది చిన్నారులను ఈ శిక్షణ కోసం బోపన్న ఎంపిక చేశారు. నైపుణ్య, ఫిట్‌నెస్‌ పరీక్షలో ఉత్తమ ప్రదర్శన నమోదు చేసిన పిల్లలను స్వయంగా బోపన్ననే ఎంచుకున్నాడు. 9 నుంచి 11 ఏళ్ల వయసు మధ్య ఉన్న ఈ పిల్లలను బెంగళూరుకు తరలించి అక్కడే ప్రపంచ స్థాయి వసతులతో కూడిన ఆర్బీటీఏ అకాడమీలో బోపన్న మార్గనిర్దేశనంలో శిక్షణ ఇస్తారు. ఉండటానికి వసతి కూడా కల్పించడంతో పాటు ఈ పిల్లల విద్యా అవసరాలూ చూసుకుంటారు. ‘‘కమల్‌ ఇండియా ఫౌండేషన్‌ యూకేతో కలిసి ఈ ప్రతిభావంతులైన చిన్నారులకు ఈ అవకాశం కల్పించడం పట్ల ఉత్తేజితంగా ఉన్నాం. ఈ కార్యక్రమం ద్వారా కేవలం వీళ్లలోని అథ్లెటిక్‌ నైపుణ్యాలను మెరుగుపర్చడమే కాకుండా భవిష్యత్‌ను తీర్చిదిద్దుకునేలా మంచి చదువు, జీవిత పాఠాలూ నేర్పించడమే లక్ష్యం. ఈశాన్య భారత్‌ నుంచి పిల్లలను తీసుకోవాలని ఓ దాత కోరాడు. అందుకే అస్సాంతో మొదలెట్టాం. మొత్తం 300 మందికి గాను 25 మందిని ఇప్పుడు తీసుకున్నాం. ఈ కార్యక్రమంలో భాగంగా ప్రతి ఏడాది దేశంలోని వివిధ ప్రాంతాల నుంచి చిన్నారులను ఎంపిక చేస్తాం’’ అని బోపన్న తెలిపాడు.