బంగ్లాకు మరో విజయం

చట్టోగ్రామ్‌: జింబాబ్వేతో అయిదు టీ20ల సిరీస్‌లో బంగ్లాదేశ్‌ వరుసగా రెండో విజయం సాధించింది. ఆదివారం రెండో టీ20లో ఆ జట్టు 6 వికెట్ల తేడాతో నెగ్గింది. మొదట జింబాబ్వే 20 ఓవర్లలో 7 వికెట్లకు 138 పరుగులే చేసింది. తస్కిన్‌ అహ్మద్‌ (2/18), రిషాద్‌ హొస్సేన్‌ (2/33)ల ధాటికి ఒక దశలో జింబాబ్వే 42 పరుగులకే 5 వికెట్లు కోల్పోయి పీకల్లోతు కష్టాల్లో పడింది. అయితే బ్రయాన్‌ బెనెట్‌ (44 నాటౌట్‌), జొనాథెన్‌ క్యాంప్‌బెల్‌ (45) పోరాడి జట్టుకు గౌరవప్రదమైన స్కోరునందించారు. అనంతరం జాంగ్వి (2/35) ఒకే ఓవర్లో 2 వికెట్లు తీయడంతో బంగ్లా 62/3తో ఇబ్బందుల్లో పడ్డప్పటికీ.. ‘మ్యాన్‌ ఆఫ్‌ ద మ్యాచ్‌’ తౌహిద్‌ హృదోయ్‌ (37; 25 బంతుల్లో 3×4, 2×6), మహ్మదుల్లా (26 నాటౌట్‌; 16 బంతుల్లో 2×4, 1×6) నిలకడగా ఆడి జట్టును గెలిపించారు. మూడో టీ20 మంగళవారం జరుగుతుంది.