క్రొయేషియా ఘనవిజయం.. కెనడా ఔట్‌

ఆల్‌ రయాన్‌: ఫిఫా ప్రపంచకప్‌లో వరుస సంచలనాల నేపథ్యంలో క్రొయేషియాపై కెనడా ఆధిక్యంలోకి వెళ్లడంతో మరో అనూహ్య ఫలితం తప్పదేమో అనిపించింది. కానీ షాక్‌ నుంచి తేరుకుని, గొప్పగా పుంజుకున్న క్రొయేషియా ఘనవిజయంతో నాకౌట్‌ అవకాశాలను మెరుగుపరుచుకుంది. క్రమారిక్‌ ‘డబుల్‌’ సాధించడంతో ఆదివారం గ్రూప్‌-ఎఫ్‌ మ్యాచ్‌లో ఆ జట్టు 4-1తో కెనడాపై ఘన విజయం సాధించింది. 2వ నిమిషంలో కెనడా ఆటగాడు డేవిస్‌ హెడర్‌ గోల్‌తో క్రొయేషియాకు షాక్‌ ఇచ్చాడు. కానీ క్రొయేషియా వెనక్కి తగ్గలేదు. ఎదురు దాడులకు దిగింది. క్రమారిక్‌ 36వ నిమిషంలో గోల్‌తో స్కోరు సమం చేశాడు. మార్కో (44వ ని) ఓ మెరుపు గోల్‌తో క్రొయేషియాకు ఆధిక్యాన్నందించాడు. 70వ నిమిషంలో క్రమారిక్‌ రెండో గోల్‌ సాధించడం, లోవ్రో 94వ నిమిషంలో బంతిని నెట్‌లోకి పంపడంతో క్రొయేషియా ఘనవిజయాన్ని అందుకుంది. ఆడిన రెండు మ్యాచ్‌ల్లో ఓడిన కెనడా టోర్నీ నుంచి నిష్క్రమించింది.