జపాన్‌కు కోస్టారికా దెబ్బ

అల్‌ రయాన్‌: ప్రపంచకప్‌లో తమ తొలి మ్యాచ్‌లో నాలుగు సార్లు విజేత జర్మనీకి షాకిచ్చిన జపాన్‌కు కళ్లెం పడింది. ఆదివారం గ్రూప్‌-ఈ పోరులో కోస్టారికా 1-0తో ఆ జట్టును దెబ్బకొట్టింది. కీషెర్‌ ఫుల్లర్‌ (81వ నిమిషంలో) గెలుపు గోల్‌ కొట్టాడు. గత మ్యాచ్‌లో స్పెయిన్‌ చేతిలో 0-7తో చిత్తయిన కోస్టారికా.. ఈ పోరులో మెరుగైన ప్రదర్శన చేసింది. మొదటి నుంచి దూకుడు ప్రదర్శించింది. ప్రత్యర్థి గోల్‌పోస్టుపై ఎదురు దాడులు చేసింది. జపాన్‌ కూడా ప్రతిఘటించడంతో తొలి అర్ధభాగంలో గోల్సేమీ నమోదు కాలేదు. విరామం తర్వాత కూడా చాలా సమయం వరకూ ఏ జట్టూ ఖాతా తెరవలేకపోయింది. దీంతో టోర్నీలో మరో గోల్‌ లేని డ్రా తప్పదనిపించింది. కానీ ప్రత్యర్థి డిఫెన్స్‌ తప్పిదాన్ని సొమ్ము చేసుకున్న ఫుల్లర్‌ 18 మీటర్ల దూరం నుంచి బంతిని నెట్‌లోకి పంపించాడు. దీంతో కోస్టారికా సంతోషంలో మునిగిపోయింది.