KL Rahul: ఘనంగా కేఎల్ రాహుల్- అతియా శెట్టి వివాహం

ఇంటర్నెట్ డెస్క్: భారత స్టార్‌ క్రికెటర్‌ కేఎల్‌ రాహుల్‌ (KL Rahul) ఓ ఇంటి వాడయ్యాడు. తన ప్రియురాలు, బాలీవుడ్‌ నటుడు సునీల్‌శెట్టి కుమార్తె, నటి అతియాశెట్టి (Athiya Shetty)ని కుటుంబ సభ్యుల సమక్షంలో వివాహమాడాడు. మహారాష్ట్రలో ఖండాలాలోని సునీల్‌శెట్టికి చెందిన ఫామ్‌హౌస్‌లో వీరి వివాహం వైభవంగా జరిగింది. ఈ వేడుకకు అతికొద్ది మంది అతిథులను మాత్రమే ఆహ్వానించారు. బాలీవుడ్‌ నటుడు సల్మాన్‌ఖాన్‌, క్రికెటర్‌ ఇషాంత్‌ శర్మ దంపతులు, వరుణ్ ఆరోన్‌ తదితరులు ఈ వేడుకకు హాజరై నూతన వధూవరులను ఆశీర్వదించారు. అతియా శెట్టి, కేఎల్ రాహుల్ గత కొంతకాలంగా ప్రేమలో ఉన్న సంగతి తెలిసిందే. ఐపీఎల్‌ పూర్తయిన తర్వాత  రిసెప్షన్‌ ఏర్పాటు చేసే అవకాశముంది.

అతియా.. నీ వెలుగులో ప్రేమించడం ఎలాగో నేర్చుకున్నా... ‘‘ ఈ రోజు అత్యంత ప్రియమైన వారి సమక్షంలో మా ఇద్దరం వివాహం చేసుకున్నాం. ఈ సందర్భం మాకు అపారమైన ఆనందాన్నిచ్చింది. మూడు ముళ్ల బంధంతో ఒక్కటైన మా జంట మీ ఆశీర్వాదాలను కోరుతోంది’’ అంటూ రాహుల్‌ ట్వీట్‌ చేస్తూ పెళ్లి ఫొటోలను పంచుకున్నారు. ఈ నూతన జంటకు సామాజిక మాధ్యమాల వేదికగా శుభాకాంక్షలు వెల్లువెత్తుతున్నాయి. బాలీవుడ్‌ నటి ఆలియా భట్‌ ఇద్దరికీ కంగ్రాట్స్‌ చెబుతూ.. ఫొటోలను ఇన్‌స్టాగ్రామ్‌లో పోస్టు చేసింది. కియారా అడ్వాణీ,కరీనా కపూర్‌, అనన్య పాండే,విక్కీ కౌశల్‌ తదితరులు నూతన దంపతులకు శుభాకాంక్షలు తెలిపారు. విరాట్‌ కోహ్లీ ‘Congratulations’ అని పోస్టు పోస్ట్‌ చేయగా..  కంగ్రాట్స్‌ అతియా అంటూ కృతి సనన్‌ కామెంట్‌ చేశారు.

జంటకు ఆదివారం  ఉదయం మెహందీ కార్యక్రమాన్ని నిర్వహించారు. అదే రోజు సాయంత్రం సంగీత్‌ను నిర్వహించగా.. వధూవరులతోపాటు ఇరు కుటుంబ సభ్యులు బాలీవుడ్‌ పాటలకు నృత్యాలు చేసి అలరించారు. సోమవారం ఉదయం హల్దీ ఫంక్షన్‌ నిర్వహించారు. పెళ్లి కోసమే న్యూజిలాండ్‌తో జరుగుతున్న వన్డే, టీ20 సిరీస్‌కు రాహుల్‌ దూరమైన సంగతి తెలిసిందే. ఫిబ్రవరిలో ఆసీస్‌తో జరగనున్న టెస్టు సిరీస్‌ నుంచి అతడు అందుబాటులో ఉండనున్నాడు. తర్వాత ఐపీఎల్‌లో ఆడతాడు. ఇలా ప్రస్తుతం రాహుల్‌కు బిజీ షెడ్యూల్‌ ఉండటంతో ఐపీఎల్‌ పూర్తయిన తర్వాత రిసెప్షన్‌ ఏర్పాటు చేయనున్నట్లు సమాచారం.