Ellyse Perry: నాకు బీమా లేదనుకుంటా.. కారు అద్దం ధ్వంసంపై ఎలీస్‌ పెర్రీ

ఇంటర్నెట్‌డెస్క్‌: మహిళల ప్రీమియర్‌ లీగ్‌లో సీజన్‌-2లో ఆర్సీబీ తరఫున ఎలీస్‌ పెర్రీ నిన్న యూపీ వారియర్స్‌పై చెలరేగిపోయింది. 4 ఫోర్లు, 4 సిక్సర్లతో కేవలం 37 బంతుల్లోనే 58 పరుగులు సాధించింది. 19వ ఓవర్‌లో సిక్స్‌ బాదింది. బంతి అక్కడే ప్రదర్శనకు ఉంచిన కారు అద్దాన్ని బద్దలు కొట్టింది. దీన్ని ప్రేక్షకులు, ఆటగాళ్లు ఆశ్చర్యంగా చూశారు. దీనికి పెర్రీ ప్రతిస్పందన కూడా భిన్నంగా ఉంది. ఇప్పుడా వీడియో వైరల్‌గా మారింది. 

మ్యాచ్‌ అనంతరం ఇంటర్వ్యూలో ఆ ఘటనపై పెర్రీ సరదాగా స్పందించింది. ‘‘ఆ కారు నష్టం చెల్లించడానికి నాకు బీమా ఉందో లేదో తెలియదు’’ అని పేర్కొంది. అంతేకాదు.. భారత్‌లోని ప్రేక్షకులను మెచ్చుకొంది. ‘‘నేను ఆడిన ఐదు మ్యాచ్‌లు మంచి అనుభవాన్నిచ్చాయి. నా కెరీర్‌లో ఇక్కడే అద్భుతమైన వాతావరణం చూశా. ప్రేక్షకుల నుంచి జట్టు సభ్యులకు లభించిన మద్దతు చాలా బాగుంది. గత రెండు నెలల్లో చాలా క్రికెట్‌ ఆడాను. ఈ మ్యాచ్‌లో తొలుత స్మృతిని సపోర్ట్‌ చేయడమే నా బాధ్యత. ఆ తర్వాత నేను స్వేచ్ఛగా ఆడాను. లెఫ్ట్‌-రైట్‌ కాంబినేషన్‌ కొంచెం విభిన్నంగా ఉంటుంది. నేడు మావాళ్లు మంచి ఫామ్‌లో ఉన్నారు’’ అని తన అభిప్రాయాన్ని పంచుకొంది. 

ఆ ఓటమికి కెప్టెన్‌దే తప్పన్న కోచ్‌.. దినేశ్‌ కార్తిక్‌ ఆగ్రహం

మహిళల ప్రిమియర్‌ లీగ్‌ సీజన్‌-2లో వరుసగా రెండు ఓటముల తర్వాత రాయల్‌ ఛాలెంజర్స్‌ బెంగళూరు గాడిలో పడింది. బ్యాటింగ్‌లో అదరగొట్టి.. బౌలింగ్‌లో సమష్టిగా సత్తా చాటి యూపీ వారియర్స్‌ను 23 పరుగుల తేడాతో ఓడించింది. మొదట స్మృతి మంధాన , ఎలీస్‌ పెర్రీ మెరుపులతో ఆర్సీబీ 3 వికెట్లకు 198 పరుగుల భారీ స్కోరు చేసింది. బదులుగా యూపీ 175/8కే పరిమితమైంది.