Rishabh Pant: రిషభ్‌పంత్‌ స్థానంలో అతడే సరైన ప్రత్యామ్నాయం: ప్రజ్ఞాన్‌ ఓజా

ఇంటర్నెట్‌ డెస్క్‌: రోడ్డు ప్రమాదానికి గురైన టీమ్ఇండియా యువ ఆటగాడు రిషభ్ పంత్ ఐపీఎల్‌ 2023 సీజన్‌లో ఆడటం కష్టమే. దీంతో అతడి స్థానంలో దిల్లీ క్యాపిటల్స్‌కు వార్నర్‌ను కెప్టెన్‌గా చేయాలని అభిమానులు కోరుతున్నారు. మరో ఆటగాడు ఫిల్‌ సాల్ట్‌కు తుది చోటు కల్పిస్తే మంచిదని భారత మాజీ క్రికెటర్‌ ప్రజ్ఞాన్‌ ఓజా అభిప్రాయపడ్డాడు. 

‘‘ముఖ్యమైన విషయం ఏంటంటే.. ప్రస్తుతం దిల్లీ ఉన్న పరిస్థితుల్లో సాల్ట్‌ వంటి వ్యక్తి చాలా అవసరం. సాల్ట్‌ ప్రస్తుతం మంచి ఫామ్‌లో ఉన్నాడు. రిషభ్‌పంత్‌ స్థానంలో అతడు గొప్పగా రాణించగలడు’’ అని ఓజా అభిప్రాయపడ్డాడు. గతేడాది రోడ్డు ప్రమాదానికి గురైన రిషభ్‌ పంత్‌ ఐపీఎల్‌లో ఆడడం వీలుకాదని దిల్లీ డైరెక్టర్ ఆఫ్‌ క్రికెట్‌ బాధ్యతలు చేపట్టే సౌరభ్‌ గంగూలీ ఇటీవల ప్రకటించాడు. దాంతో దిల్లీ జట్టుపై తీవ్ర ప్రభావం పడే అవకాశం ఉంది. 

ఐపీఎల్‌ మినీ వేలంలో దిల్లీ ఫ్రాంచైజీ ఫిల్‌ సాల్ట్‌ను రూ. 2 కోట్లతో కొనుగోలు చేసింది. ఐపీఎల్ మాదిరిగా ప్రస్తుతం దక్షిణాఫ్రికాలో ఎస్‌ఏ20 లీగ్‌ జరుగుతోంది. ప్రిటోరియా క్యాపిటల్స్‌ జట్టు తరఫున ఆడుతున్న సాల్ట్‌ గురువారం మ్యాచ్‌లో విన్నింగ్‌ నాక్‌ ఆడాడు. 47 బంతుల్లో 11 ఫోర్లు బాది 77 పరుగులు సాధించాడు. దీంతో ప్రిటోరియా క్యాపిటల్స్ , సన్‌రైజర్స్‌ ఈస్టెన్‌ కేప్‌ జట్టును 23 పరుగుల తేడాతో ఓడించి పాయింట్ల పట్టికలో రెండో స్థానానికి చేరింది. ఈ లీగ్‌లో అద్భుతమైన ప్రదర్శన చేసిన సాల్ట్‌ను ఓజా ప్రశంసించాడు. దిల్లీ జట్టుకు సాల్ట్‌ అవసరమని వ్యాఖ్యానించాడు.