Sachin tendulkar: టీమ్‌ఇండియాకు లెఫ్ట్‌ హ్యాండర్‌ బ్యాటర్‌ అవసరం: సచిన్‌

దిల్లీ: ఆస్ట్రేలియా గడ్డపై ప్రపంచకప్‌ పోరు సమీపిస్తున్నవేళ టీమ్‌ఇండియా జట్టు అనుసరించాల్సిన వ్యూహాలపై సచిన్‌ తెందూల్కర్‌ ఆసక్తికర వ్యాఖ్యలు చేశాడు. టీమ్‌ఇండియా తుది జట్టులో ఒక లెఫ్ట్‌ హ్యాండర్‌ బ్యాటర్‌ ఉండాల్సిన అవసరం ఉందని తెలిపాడు. 

‘‘జట్టులో లెఫ్ట్‌ హ్యాండర్‌ బ్యాటర్‌ ఉంటే అది కచ్చితంగా అదనపు ప్రయోజనం చేకూరుస్తుంది. ప్రత్యర్థి బౌలర్లు, ఫీల్డర్లకు అందుకు అనుగుణంగా కుదురుకోవాల్సి ఉంటుంది. తరచూ స్ట్రైక్‌ రొటేట్‌ చేయడం వల్ల బౌలర్లను ఇరుకున పెట్టొచ్చు’’ అని వివరించాడు. జట్టులో టాప్‌ 3 స్థానాల గురించి మాట్లాడుతూ.. కేవలం ముగ్గురిపైనే ఆధారపడి ముందుకు వెళ్లకూడదని తెలిపాడు. ఎవరు ఎందులో బాగా రాణిస్తారో తెలుసుకుని వారిని ఆ స్థానంలో పంపాలని, అదే సమయంలో ప్రత్యర్థి బలాలను అంచనా వేయాలని ఈ మాజీ కెప్టెన్‌ పేర్కొన్నాడు. ప్రస్తుతం టీమ్‌ఇండియాలో ఆరుగురు రైట్‌ హ్యాండ్‌ బ్యాటర్లు ఉన్న విషయం తెలిసిందే. ఇటీవల ఆసీస్‌తో జరిగిన వార్మప్‌ మ్యాచుల్లో నిరూపించుకోలేకపోయిన  లెఫ్ట్‌ హ్యాండ్‌ర్‌ బ్యాటర్‌ రిషభ్‌ పంత్‌ తుది జట్టులో ఉంటాడా లేదా అనేది సందేహమే. అక్షర్‌ పటేల్‌ ఆల్‌రౌండర్‌గా కొనసాగుతుండగా.. దినేశ్‌ కార్తీక్‌ ఫినిషర్‌గా ఆడనున్న విషయం తెలిసిందే.