Boxing: భారత్‌కు మరో స్వర్ణం

దుబాయ్‌: ఆసియా బాక్సింగ్ ఛాంపియన్‌షిప్‌లో భారత్‌ మరో పసిడిని సొంతం చేసుకుంది. 91 కేజీల విభాగంలో భారత బాక్సర్‌ సంజీత్‌ స్వర్ణ పతకం గెలుపొందాడు. ఉత్కంఠ పోరులో కజకిస్థాన్‌ ఆటగాడు వాసిలీ లివిత్‌ను 3-2 తేడాతో మట్టికరిపించాడు. అంతకుముందు జరిగిన మ్యాచ్‌ల్లో భారత బాక్సర్లు శివ థాపా, అమిత్‌ పంఘాల్‌లు రజత పతకాలు గెలిచారు. 64 కేజీల విభాగంలో జరిగిన ఫైనల్‌లో మంగోలియా బాక్సర్‌ చింజోరిగ్‌ చేతిలో శివ థాపా 2-3 తేడాతో ఓటమి పాలయ్యాడు. ఇక మరో భారత బాక్సర్‌ అమిత్‌ పంఘాల్‌ 52 కేజీల విభాగంలో జరిగిన ఫైనల్‌లో ఉజ్బెకిస్థాన్‌ ఆటగాడు జోయ్‌రొవ్‌ చేతిలో 2-3 తేడాతో ఓటమిపాలయ్యాడు. జోయ్‌రొవ్‌ చేతిలో అమిత్‌ ఓడిపోవడం ఇది మూడోసారి. ఈ ఛాంపియన్‌షిప్‌లో భారత్‌ రెండు స్వర్ణాలను గెలిచింది. ఆదివారం జరిగిన 75 కిలోల విభాగంలో హరియాణా బాక్సర్‌ పూజారాణి  స్వర్ణం సాధించిన విషయం తెలిసిందే.