Sourav Ganguly: నిలకడగా గంగూలీ ఆరోగ్యం.. బులిటెన్‌ విడుదల

కోల్‌కతా: బీసీసీఐ అధ్యక్షుడు సౌరభ్‌ గంగూలీ ఆరోగ్యం నిలకడగా ఉన్నట్లు కోల్‌కతాలోని వుడ్‌లాండ్‌ ఆసుపత్రి యాజమాన్యం వెల్లడించింది. చికిత్స అందిస్తున్నామని, ఆయన ఆరోగ్యం స్థిరంగా ఉందని పేర్కొంది. ఎలాంటి జ్వరం లేదని, భయపడాల్సిన అవసరం లేదని స్పష్టం చేసింది. రాత్రంతా నిద్రపోయారని, భోజనం కూడా తీసుకుంటున్నట్లు తెలిపింది. నిపుణులైన వైద్యులు గంగూలీని పర్యవేక్షిస్తున్నారని ఓ ప్రకటన ద్వారా వెల్లడించింది.

భారత జట్టు మాజీ కెప్టెన్‌, బీసీసీఐ అధ్యక్షుడు గంగూలీ కరోనా బారినపడిన విషయం తెలిసిందే. కొవిడ్‌ పరీక్షల్లో పాజిటివ్‌ రావడంతో ఆయన సోమవారం వుడ్‌లాండ్‌ ఆస్పత్రిలో చేరాడు. ఇప్పటికే ఆయన రెండు సార్లు కొవిడ్‌-19 టీకా తీసుకున్నాడు. 49 ఏళ్ల గంగూలీకి ఈ ఏడాది  యాంజియోప్లాస్టీ జరిగింది.