T20 World Cup : ఈ టీ20 ప్రపంచకప్‌లో అత్యధిక పరుగుల వీరుడెవరో సెహ్వాగ్‌ చెప్పేశాడు..

ఇంటర్నెట్‌ డెస్క్‌ :  టీ20 ప్రపంచకప్‌లో అసలు సిసలు క్రికెట్‌ మజాను అందించే సూపర్‌ 12 సమరానికి సర్వం సిద్ధమైంది. శనివారం నుంచి ఈ పోరు ప్రారంభం కానుండగా.. ఆ మరుసటి రోజే చిరకాల ప్రత్యర్థులైన భారత్‌-పాక్‌ మధ్య హై వోల్టేజ్‌ మ్యాచ్‌ ఉండనుంది. ప్రపంచ వ్యాప్తంగా క్రికెట్‌ అభిమానులు ఈ మ్యాచ్‌ కోసం ఎంతో ఆసక్తిగా ఎదురుచూస్తున్నారు.

రోహిత్‌ శర్మ, బాబర్‌ ఆజామ్‌ నేతృత్వంలోని జట్ల మధ్య పోరు హోరాహోరీగా ఉండనుందనడంలో ఎలాంటి సందేహం లేదు. ఈ నేపథ్యంలో మాజీ డ్యాషింగ్‌ ఓపెనర్‌ సెహ్వాగ్‌ ఆసక్తికర వ్యాఖ్యలు చేశాడు. ఈ టోర్నీలో అత్యధిక పరుగులు సాధించే ఆటగాడెవరో అంచనా వేశాడు. అయితే.. అతడు భారత ఆటగాడు కాకపోవడం గమనార్హం. పాక్‌ కెప్టెన్‌ బాబర్‌ ఈ టోర్నీలో అత్యధిక పరుగుల వీరుడిగా నిలుస్తాడని జోస్యం చెప్పాడు.

‘బాబర్‌ ఆజామ్‌ బ్యాటింగ్‌ బ్రిలియంట్‌గా ఉంటుంది. అతడి ఆటను చూడటం చాలా గొప్పగా అనిపిస్తుంది. కోహ్లీ బ్యాటింగ్‌ను తలపిస్తుంది. అతడి ఆట తీరును మీరు ఆస్వాదిస్తారు’ అని ఓ క్రీడా ఛానల్‌తో మాట్లాడుతూ సెహ్వాగ్‌ కొనియాడాడు.

ఇక సెహ్వాగ్ అంచనాలు నిజమవుతాయని.. ఆసీస్‌ ఆటగాడు డేవిడ్‌ వార్నర్‌ గుర్తుచేసుకున్నాడు. టెస్టుల్లో తన సామర్థ్యాన్ని గుర్తించింది అతడే అని పేర్కొన్నాడు. తాను మంచి టెస్టు ప్లేయర్‌ కాగలనని సెహ్వాగ్‌ చెప్పినప్పుడు ఆశ్చర్యపోయానని తెలిపాడు.