కౌంటరు దాఖలులో జాప్యంపై హైకోర్టు అసంతృప్తి

రాయదుర్గంలో భూ కేటాయింపుల వ్యవహారం..

ఈనాడు, హైదరాబాద్‌: రంగారెడ్డి జిల్లా శేరిలింగంపల్లి మండలం రాయదుర్గంలో టీఎస్‌ఐఐసీకి చెందిన 31.35 ఎకరాల భూమి కేటాయింపులపై దాఖలైన ప్రజాప్రయోజన వ్యాజ్యంలో రెండేళ్లుగా ప్రభుత్వం కౌంటరు దాఖలు చేయకపోవడంపై హైకోర్టు అసంతృప్తి వ్యక్తం చేసింది. 6 వారాల్లో కౌంటరు దాఖలు చేయాలని ఆదేశిస్తూ విచారణను వాయిదా వేసింది. ఈ భూమి కేటాయింపులను సవాలు చేస్తూ ఎంపీ రేవంత్‌రెడ్డి 2020 ఫిబ్రవరిలో ప్రజాప్రయోజన వ్యాజ్యం దాఖలు చేశారు. డీఎల్‌ఎఫ్‌ కొనుగోలు చేసిన భూములు అక్రమంగా మైహోం గ్రూపునకు చెందిన కంపెనీకి వెళ్లాయని ఆరోపించారు.  ఈ పిటిషన్‌పై ప్రధాన న్యాయమూర్తి జస్టిస్‌ సతీష్‌ చంద్ర శర్మ, జస్టిస్‌ అభినంద్‌కుమార్‌ షావిలిలతో కూడిన ధర్మాసనం గురువారం విచారణ చేపట్టింది. కేసులో ప్రతివాదిగా ఉన్న ఆక్వా స్పేస్‌ డెవలపర్స్‌ ప్రైవేట్‌ లిమిటెడ్‌ కౌంటరు దాఖలు చేసింది. ఆ భూమిని రూ.580.50 కోట్లకు బిడ్‌లో దక్కించుకోవడంలో ప్రభుత్వం నుంచి ఎలాంటి ప్రత్యేక ప్రయోజనాలు పొందలేదని, చట్టప్రకారమే కొనుగోలు చేశామని పేర్కొంది.