సీఎంగా స్టాలిన్‌కు ప్రజాదరణ.. ప్రధాని అభ్యర్థిగా రాహుల్‌ వైపు తమిళుల మొగ్గు

ఐఏఎన్‌ఎస్‌-సీఓటర్‌ సర్వేలో వెల్లడి

ఈనాడు, చెన్నై: దక్షిణాది రాష్ట్రాల్లో తమిళనాడు ముఖ్యమంత్రి ఎం.కె.స్టాలిన్‌కు ప్రజాదరణ పెరుగుతోందని ఇండో ఏషియన్‌ న్యూస్‌ సర్వీస్‌ (ఐఏఎన్‌ఎస్‌)-సీఓటర్‌ సర్వే వెల్లడించింది. ఈ సంస్థ తాజాగా వెల్లడించిన ఈ సర్వే వివరాల ప్రకారం.. 2021లో ఎన్నికలు జరిగిన అస్సాం, పశ్చిమబెంగాల్‌, తమిళనాడు, కేరళ రాష్ట్ర ప్రభుత్వాల పనితీరు పరంగా చూస్తే తమిళనాడు సర్కారు అత్యంత ప్రజాదరణ పొందిందని ఆయా సంస్థల ప్రతినిధులు తెలిపారు. ముఖ్యమంత్రులందరిలో అత్యధికంగా 85% మద్దతు స్టాలిన్‌కే ఉన్నట్లు వెల్లడించారు.

* కాబోయే ప్రధాని ఎవరైతే బాగుంటుందని తమిళనాడులో నిర్వహించిన ఇదే సర్వేలో.. రాహుల్‌గాంధీకి అనుకూలంగా 54% మంది మద్దతు తెలిపారన్నారు. ప్రస్తుత ప్రధాని నరేంద్రమోదీకి 32% మంది అనుకూలంగా ఉన్నట్లు వెల్లడించారు. మోదీ పనితీరు బాగుందని 17% మంది సంతృప్తి వ్యక్తం చేయగా, 40% మంది కొంతవరకు బాగుందని తెలిపినట్లు పేర్కొన్నారు. ఇంకో 40% మంది అసంతృప్తి వ్యక్తం చేశారన్నారు. దక్షిణ భారత రాష్ట్రాల్లో ప్రజలు తమ భవిష్యత్తుపై ఆశాభావంతో ఉన్నట్లు తేలిందని తెలిపారు. సుమారు 45% మంది రానున్న ఏడాదిలో తమ జీవన ప్రమాణాలు పెరుగుతాయని ఆత్మవిశ్వాసంతో ఉన్నారని చెప్పారు. 13% మంది మాత్రం తమకు గడ్డు పరిస్థితి తప్పదన్నట్లుగా స్పందించారు. మరో 12% మంది వచ్చే ఏడాది కూడా పరిస్థితులు ఇలాగే ఉంటాయనే నిరాశను వ్యక్తం చేశారన్నారు.