బస్సుల కోసం రెండు సంస్థల టెండర్లు

వచ్చే వారంలోగా ఖరారు: వీసీ సజ్జనార్‌

ఈనాడు, హైదరాబాద్‌: రాష్ట్ర ఆర్టీసీకి నూతన బస్సుల సరఫరా కోసం రెండు సంస్థలు టెండర్లు దాఖలు చేశాయి. కాలం చెల్లిన బస్సుల స్థానంలో దశలవారీగా కొత్తవాటిని కొనుగోలు చేయాలని ఆర్టీసీ నిర్ణయించింది. తొలిదశలో 1,016 బస్సులు కొనుగోలు చేయాలని నిర్ణయించింది. అత్యాధునిక విద్యుత్తు, ఏసీ బస్సుల నుంచి పల్లె వెలుగు బస్సుల  కొనుగోలు కోసం కూడా టెండర్లు ఆహ్వానించి శనివారం తెరిచింది. టాటా, అశోక్‌ లేల్యాండ్‌ సంస్థలు మాత్రమే దాఖలు చేశాయి. సాంకేతికంగా రెండూ అర్హత పొందాయి. ఆర్థిక బిడ్స్‌ను పరిశీలించిన మీదట అర్హత పొందిన సంస్థను ఖరారు చేస్తారు. ధరల విషయంలో సంప్రదింపులు నిర్వహించిన మీదట వారం రోజుల వ్యవధిలో తుది నిర్ణయాన్ని తీసుకుంటామని ఆర్టీసీ మేనేజింగ్‌ డైరెక్టర్‌ వీసీ సజ్జనార్‌ ‘ఈనాడు’కు చెప్పారు. అన్ని బస్సుల కోసం టెండర్లు దాఖలయ్యాయని తెలిపారు.