Vemulawada: నిర్మాణ లోపంతో రూ.14.17 కోట్లు ‘ఢాం’

బొల్లారంలో మూలవాగుపై చెక్‌డ్యాం పేల్చివేత
ఇళ్లకు ప్రమాదం పొంచి ఉండటంతో అధికారుల చర్య

వేములవాడ, న్యూస్‌టుడే: కోట్ల రూపాయలతో నిర్మించిన చెక్‌డ్యాంను అధికారులు జిలెటిన్‌ స్టిక్స్‌ పెట్టి పేల్చివేసిన సంఘటన మంగళవారం రాజన్న సిరిసిల్ల జిల్లాలో చోటుచేసుకుంది. వివరాల్లోకి వెళితే... వేములవాడ గ్రామీణ మండలంలోని బొల్లారం గ్రామ సమీపంలో మూలవాగుపై గత ఏడాది   రూ.14.17 కోట్లతో చెక్‌డ్యాం నిర్మించారు. ఆగస్టులో కురిసిన భారీ వర్షాలకు ఈ చెక్‌డ్యాం సైడ్‌బండ్‌ భారీగా కోతకు గురైంది. ఆకృతి లోపంతో ఎత్తుగా నిర్మించడంతోనే ఇలా జరిగింది. తాజాగా మూడు రోజులుగా కురుస్తున్న భారీ వర్షాలకు మూలవాగు ఉద్ధృతంగా ప్రవహిస్తోంది. దీంతో తమ గ్రామానికి ప్రమాదం పొంచి ఉందని బొల్లారం వాసులు ఆందోళన వ్యక్తంచేశారు. మంగళవారం వరద ఉద్ధృతి మరింత పెరిగి ఇళ్లకు ప్రమాదం పొంచి ఉండటంతో కలెక్టర్‌ అనురాగ్‌ జయంతి, స్థానిక ఎమ్మెల్యే రమేశ్‌బాబు ఆదేశాల మేరకు నీటిపారుదల, పోలీస్‌ శాఖల అధికారులు చెక్‌డ్యాం మధ్యలో జిలెటిన్‌స్టిక్స్‌ అమర్చి పేల్చివేశారు. మూలవాగుపై 130 మీటర్ల పొడవున్న చెక్‌డ్యాం మధ్యలో దాదాపు తొమ్మిది మీటర్ల పొడవు, ఒక మీటరు లోతుతో సిమెంట్‌, కాంక్రీట్‌ గోడను తొలగించి వరద సాఫీగా పోయేలా అధికారులు చర్యలు చేపట్టారు.