Breaking | Feedback | ePratibha | E-PAPER | Pratibha

తుర్కియేలో మన బినా!

Published : 16 Feb 2023 00:58 IST

తుర్కియే భారీ భూకంపంలో శిధిలాల మధ్య చిక్కుకొని గాయాలపాలైన వారికి ఆమె వైద్య సేవలందిస్తున్నారు. ప్రేమతో చేస్తున్న ఆ సేవలు చూసి ఓ మహిళ ఆమెను ముద్దాడుతున్న ఫొటో ఒకటి.. సామాజిక మాధ్యమాల్లో వైరల్‌ అవుతోంది. చికిత్సతో పాటు చిన్నారుల ముఖాల్లో చిరునవ్వులు నింపుతోన్న ఆవిడకు లక్షలమంది శభాష్‌ చెబుతున్నారు. ఆమె మరెవరో కాదు.. మన ఆడపడుచు.. డాక్టర్‌ మేజర్‌ బినా తివారీ.

దేెహ్రాదూన్‌కు చెందిన బినా తివారీ తాత ఆర్మీలో సుబేదారు. తండ్రి సైనికుడు. బాల్యం నుంచి వీరిద్దరినీ చూస్తూ పెరిగిన బినాకు దేశసేవలో భాగం అవ్వాలనిపించింది. వారి నుంచి స్ఫూర్తి పొందిన ఈమె వాళ్లకు వారసురాలు కావాలనుకున్నారు. దిల్లీ ఆర్మీ కాలేజీ మెడికల్‌ సైన్స్‌లో డిగ్రీ పూర్తిచేసి, భారతసైన్యంలో వైద్యురాలిగా శిక్షణ తీసుకున్నారు. మొదటిసారిగా అసోంలో విధులు నిర్వహించారు.

మేమున్నామనీ... తుర్కియే భూకంప బాధితులకు సేవలందించడానికి గతవారం భారత్‌ తరఫున 14 మంది వైద్యులు, 86 మంది పారామెడికల్‌ సభ్యుల బృందం వెళ్లింది. ఇండియన్‌ ఆర్మీ అక్కడ తాత్కాలికంగా ఆసుపత్రి ప్రారంభించి ‘ఆపరేషన్‌ దోస్త్‌’ పేరుతో వైద్య సేవలందిస్తోంది. ఈ బృందంలో ఒకే ఒక మహిళ డాక్టర్‌ బినా తివారి. గాయపడిన, శిథిలాల నుంచి బయటపడిన వారికి చికిత్స చేస్తున్నారీమె. ముఖ్యంగా చిన్నారులు, వృద్ధులు, మహిళలకు బినా ధైర్యంతో పాటు ప్రేమనీ పంచుతున్నారు. అదిచూసి తమ ప్రాణాలను నిలపడానికి వచ్చిన దేవతగా అక్కడివారంతా ఆమెను భావిస్తున్నారు. అలా ఒక వృద్ధురాలు తన అభిమానాన్ని ముద్దిచ్చి ప్రకటించడం అక్కడే ఉన్న ఏడీజీ కంటపడింది. ఆ ఆఫీసర్‌ ఈ సన్నివేశాన్ని ఫొటో తీసి తన ట్విటర్‌లో పొందుపరిచారు. ఇంకోదానిలో చిన్నారికి ధైర్యమిస్తూ కనిపించారు. మానవత్వానికి ఉదాహరణ అంటూ ‘వియ్‌ కేర్‌’ శీర్షికతో ఆయన పోస్ట్‌ చేసిన ఈ ఫొటోలను లక్షలాదిమంది చూడటమే కాదు.. ఆమె సేవలను అభినందిస్తున్నారు కూడా. మనమూ శభాష్‌ చెబుదామా!

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.