Updated : 19/01/2023 06:04 IST

మనసు మాట విన్నా!

సాయంత్రమైతే అమ్మాయిని గడప దాటనివ్వని ఊరు మాది. ఇంజినీరింగ్‌ చేస్తానంటే ఊరుకుంటారా? ‘అమ్మాయిలకు పెద్ద చదువులు అనవసరం’ అన్నారు. పెళ్లి సంబంధాలు చూస్తోంటే.. భయపడి ఇంటి నుంచి పారిపోయా. చిన్న చిన్న ఉద్యోగాలు చేస్తూ, స్నేహితుల సాయంతో చదువుకున్నా. అనుకోకుండా ఆసక్తి కలిగి, ఫ్యాషన్‌ డిజైనింగ్‌ పుస్తకాలు చదివా. ఆ పరిజ్ఞానంతో నేను పని చేసే చోట అందరికీ సలహాలిచ్చేదాన్ని. అవి అందరికీ నచ్చేవి. ఒకరి సలహాతో ఉద్యోగం వదిలి సొంతంగా బొటిక్‌ ప్రారంభించా. అది విజయవంతమయ్యాకే ఫ్యాషన్‌ డిజైనింగ్‌ కోర్సు చేశా. ఇక వెను తిరిగి చూసుకోవాల్సిన అవసరం రాలేదు. అంతర్జాతీయ ఫ్యాషన్‌ షోల్లో పాల్గొనే స్థాయికి ఎదిగా. ప్యారిస్‌ ఫ్యాషన్‌ షోలో మెరిసిన తొలి భారతీయ మహిళగా నిలిచా. విన్నప్పుడు ఎంత గర్వంగా ఉంటుంది? కానీ ఆ క్రమంలో ఎన్నో ఆటంకాలు, ఎదురు దెబ్బలు. పక్కన నా అన్నవాళ్లు లేరు. ఆత్మీయుల అండ లేదు. ఒంటరి అమ్మాయిని. తిండి పెట్టే ఆ చిన్ని ఉద్యోగాన్ని వదలడానికి ఎంత ధైర్యం కావాలి! అయినా ముందడుగేశా. ఎవరో చెప్పారని కాదు. ఫ్యాషన్‌ డిజైనింగే నాకు సరైనదని నా మనసు చెప్పింది. నిరూపించుకోగలనన్న ఆత్మవిశ్వాసం నాకుంది. అందుకే ఎందరు వారించినా, నిరుత్సాహపరచినా నా నిర్ణయానికే కట్టుబడి ఉన్నా. మనకు ఏది సరైనదో చెప్పడానికి ఎవరో అవసరం లేదు. మన మనసు చాలు. దాన్ని అనుసరించి చూడండి.. ఎలా సాగాలో మనకే తెలుస్తుంది. అవకాశాలూ కనిపిస్తాయి. వాటిని అందిపుచ్చుకుంటే విజయమే మన దగ్గరికి వస్తుంది. బలవంతంగా చేసే పనిలో దూసుకెళ్లడం ఉండదు. ఆధారపడటమే ఉంటుంది. కాబట్టి.. నచ్చిందేదో తెలుసుకోండి.. ఆ పనే చేయమనేది నా సలహా!

-వైశాలి షాదంగుల్‌, ఫ్యాషన్‌ డిజైనర్‌

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.