Breaking | Feedback | ePratibha | E-PAPER | Pratibha

26 ఏళ్లకే మంత్రి!

నాయకత్వ లక్షణాలు ఉంటే హోదాలు వాటంతటవే వెతుక్కుంటూ వస్తాయనడానికి రొమినా పోర్మోఖ్తరి చక్కటి ఉదాహరణ. స్వీడన్‌లో అతి పిన్న వయసులోనే (26 ఏళ్లు) మంత్రి పదవిని చేపట్టి రికార్డు సృష్టించింది మరి!

Published : 20 Oct 2022 00:20 IST

నాయకత్వ లక్షణాలు ఉంటే హోదాలు వాటంతటవే వెతుక్కుంటూ వస్తాయనడానికి రొమినా పోర్మోఖ్తరి చక్కటి ఉదాహరణ. స్వీడన్‌లో అతి పిన్న వయసులోనే (26 ఏళ్లు) మంత్రి పదవిని చేపట్టి రికార్డు సృష్టించింది మరి!

పుట్టింది స్వీడన్‌లోని స్టాక్‌హామ్‌.. వీళ్ల కుటుంబానిది ఇరాన్‌ నేపథ్యం. ఉప్సల విశ్వ విద్యాలయం నుంచి రాజకీయ శాస్త్రంలో డిగ్రీ చేసింది. స్కూలు నుంచే నాయకత్వ లక్షణాలు ఎక్కువ. వెయిట్రెస్‌, పార్ట్‌టైమ్‌ ట్యూటర్‌ వంటి ఎన్నో ఉద్యోగాలు చేసి, ప్రభుత్వ కొలువు అందుకుంది. 2016లో... ఇరవయ్యేళ్ల వయసులోనే రాజకీయ ప్రవేశం చేసింది. లిబరల్‌ పీపుల్స్‌ పార్టీలో చేరి, మూడేళ్లలోనే యువ విభాగానికి అధ్యక్షురాలైంది. పార్టీకి రాజకీయ సలహాదారుగానూ సేవలందించింది. స్వీడన్‌ జనాభాలో 20 శాతం మంది సిరియా, ఇరాక్‌, అఫ్గనిస్థాన్‌, సోమాలియా వంటి యుద్ధ ప్రభావిత ప్రాంతాల నుంచి వలస వచ్చిన వారే. వారి హక్కులతోపాటు పర్యావరణ సంరక్షణ కోసమూ పోరాడేది. వాతావరణ మార్పులను అరికట్టేందుకు మాంసంపై పన్ను విధించాలని ప్రతిపాదించింది. స్వీడన్‌ యువతలో రొమినాకు అభిమానులు ఎక్కువ. తన అభిప్రాయాలను కుండబద్దలు కొట్టినట్లుగా చెప్పడం, అవసరమైతే ఎంతటి వారికైనా ఎదురెళ్లడం ఈమె నైజం. ఈ తీరే మంత్రి పదవినీ కట్ట బెట్టింది. తాజాగా స్వీడన్‌లో కొత్త ప్రభుత్వం ఏర్పడింది. నూతన ప్రధానిగా ఉల్ఫ్‌ క్రిస్టర్‌సన్‌ ఎన్నికయ్యారు. గతంలో ఈయన స్వీడన్‌ డెమొక్రాట్స్‌ పార్టీతో పొత్తు పెట్టుకోవాలనుకున్నారు. ఈ పార్టీ వలస విధానానికి వ్యతిరేకం. దీంతో రొమినా ఆయనపై బహిరంగంగానే విమర్శలు గుప్పించింది. ఆయన తన విధానాల్ని మార్చుకున్నాకే మద్దతిచ్చింది. క్రిస్టర్‌సన్‌ ప్రధాని అయ్యాక ఆయన అధ్యక్షతన ఏర్పాటు చేసిన సమావేశంలో రొమినా పర్యావరణ శాఖ మంత్రిగా ఎన్నికైంది. హిజాబ్‌ వివాదంలో ఇరాన్‌ మహిళలకు తన మద్దతు ప్రకటించి, అక్కడి ప్రభుత్వ తీరునీ ఎండ గడుతోంది. పుస్తకాలను చదవడానికి ఇష్టపడే రొమినా మంచి రచయిత్రి కూడా. మనదేశంలో ఇలా చిన్న వయసు అమ్మాయిని మంత్రిగా ఎప్పటికి చూడగలమో!

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.