విదేశాలకు.. ఆ కాఫీ ఘుమఘుమలు

ఇంట్లో చిన్నప్పుడు రుచిచూసిన ఆ కాఫీ పరిమళాన్ని పెద్దయ్యాక కూడా మరిచిపోలేదామె. ఆ రుచిని అందరికీ పంచడంతోపాటు.. స్థానిక రైతులకూ ఉపాధి కల్పించింది.  వ్యాపారాన్ని ప్రారంభించిన నాలుగేళ్లలోనే ఉత్తమ వ్యాపారవేత్తగా పురస్కారాన్ని అందుకున్న దాసుమర్లిన్‌ మజావ్‌ స్ఫూర్తి కథనమిది..

సొంతంగా పండించిన కాఫీ గింజలతో... రోజూ అమ్మ ఇచ్చే కాఫీని ఇష్టంగా తాగేది దాసుమర్లిన్‌ మజావ్‌. రోజంతా ఆ రుచి ఆమెని వెంటాడేది. మేఘాలయలోని తిర్నా గ్రామంలో కాఫీ గింజలు పండించే రైతు కుటుంబంలో పుట్టిందామె. తల్లిదండ్రుల ప్రోత్సాహంతో నార్త్‌ ఈస్ట్‌ హిల్‌ విశ్వవిద్యాలయం(ఎన్‌ఈహెచ్‌యూ)లో బయోకెమిస్ట్రీలో మాస్టర్స్‌ చేసిన దాసుమర్లిన్‌, ఆ తర్వాత అహ్మదాబాద్‌ కేంద్రంగా పనిచేసే నేషనల్‌ ఇన్నొవేషన్‌ ఫౌండేషన్‌లో చేరింది. పీహెచ్‌డీ పూర్తి చేసింది. సెలవుల్లో సొంతూరుకెళ్లినప్పుడు ఒక మార్పు గమనించింది. గతంలో కాఫీ తాగేవారంతా టీ తీసుకోవడం చూసింది. కాఫీ గింజలను పండించే తమ ప్రాంతంలోనే ఇలా కాఫీపై ఆసక్తి తగ్గడంపై దాసుమర్లిన్‌ను ఆలోచనలో పడేసింది.

రుచిని అందించి...

‘కాఫీ మానేసిన వారిని కారణమడిగితే గతంలో ఉన్న రుచి ఇప్పుడు లేద’నేవారు. దాంతో ఆ రుచిని అందరికీ తిరిగి అందరికీ గుర్తు చేయాలనిపించింది. అప్పుడే 2009లో ‘బ్లాక్‌ అండ్‌ వైట్‌’ కాఫీషాప్‌ ప్రారంభించా. అయితే నేననుకున్నట్లుగా కాఫీషాప్‌ నిర్వహించలేకపోయా. మా కుటుంబంలో వ్యాపారరంగంలో అడుగుపెట్టిన మొదటి మహిళను కావడంతో అనుభవం లేక ఇలా జరుగుతుందని అమ్మానాన్న భయపడ్డారు.

నేను ప్రత్యేకంగా చేసిన కాఫీ పొడితో స్నేహితులు, బంధువులకు కాఫీ చేసిచ్చి రుచి ఎలా ఉందో అడిగేదాన్ని. అందరూ ఆ రుచి బాగుందని చెప్పడంతో బ్యాంకులో రూ.3లక్షల రుణాన్ని తీసుకొని పెద్ద మొత్తంలో కాఫీపొడి తయారీ ప్రారంభించా. అలా 2016లో రెండోసారి ‘బ్లాక్‌ అండ్‌ వైట్‌’ కాఫీ షాపు తెరిచి ‘స్మోకీ ఫాల్స్‌ ట్రైబ్‌ కాఫీ’ అని పేరు పెట్టా. ‘గింజల ఎంపికతోపాటు సరైన వేడిలో వేయించి పొడిచేయడానికి ప్రత్యేకంగా జర్మన్‌ కాఫీ రోస్టర్‌ తీసుకొన్నా. ఈ పొడితో చేసే కాఫీ రుచికి అభిమానులు పెరిగారు. కాఫీ పంట గురించి అవగాహన ఉన్న నాన్న సాయంతో స్థానిక రైతులను కలిసి వర్క్‌షాపులు నిర్వహించేవాళ్లం. నాణ్యమైన కాఫీ విత్తనాలు అందించి సేద్యమెలా చేయాలో మెలకువలు చెప్పేదాన్ని.  బెంగళూరు, ముంబయి, చెన్నై, గువాహతి తదితర నగరాల నుంచి ఆర్డర్లు వస్తున్నాయి. ఫ్రాన్స్‌, న్యూజిలాండ్‌, బంగ్లాదేశ్‌, దక్షిణాఫ్రికా వంటి దేశాలకూ.. ఎగుమతి చేస్తున్నాం. ఏటా 7 టన్నుల కాఫీపొడిని విక్రయిస్తున్నాం. చుట్టుపక్కల ప్రాంతాలకు చెందిన 300మందికి పైగా రైతులు మాతో కలిసి పనిచేస్తున్నారు. 2019లో ‘మేఘాలయ ఆంత్రప్రెన్యూర్‌షిప్‌ అవార్డును ఆ రాష్ట్రముఖ్యమంత్రి చేతులమీదుగా అందుకోవడం సంతోషంగా ఉంది.