Breaking | Feedback | ePratibha | E-PAPER | Pratibha

నా శరీరాన్ని ద్వేషించా!

Updated : 11 Dec 2022 09:06 IST

చిన్నప్పటి నుంచీ బొద్దుగా ఉండేదాన్ని. లావు.. లావు అన్నా నవ్వి ఊరుకునేదాన్ని కానీ.. ఇతరులతో పోల్చుకుంటూనే ఉండేదాన్ని. పైగా ముఖమంతా మొటిమలు. అప్పుడెవరో బాగా నీళ్లు తాగు, శరీరంలో మలినాలు పోతాయి, తగ్గుతావు అన్నారు. అలాగే చేశా.. కొద్దిగా తగ్గా. ఆ ఆనందంతో రోజుకు 10 లీటర్లు తాగే దాన్ని. మరుసటి రోజు కళ్లు తిరగడం, కడుపు ఉబ్బడం మొదలైంది. ఇలా కాదని క్రాష్‌ డైట్‌లు చేశా. జిమ్‌లో గంటలకొద్దీ కష్టపడే దాన్ని. ఏ స్థాయికి వచ్చానంటే.. ఇతరులు సన్నబడ్డావన్నా.. నాకు మాత్రం నేను లావు గానే కనిపించేదాన్ని. చివరికి అది హార్మోనుల్లో అసమతుల్యతకు దారి తీసింది. సినీ రంగంలోకి వచ్చా. ఇక్కడ ప్రతి ఒక్కరూ శరీరం గురించి మాట్లాడేవారే. ‘దురదృష్టం’ అన్న పేరూ పెట్టారు. ఎక్కడికెళ్లినా.. ‘బద్ధకం తగ్గించు.. వ్యాయామాలు మొదలు పెట్టు’ అన్న సలహాలే. వాళ్లందరికీ ‘మీకెవరు చెప్పారు నేను డైట్‌ చేయడం లేదని! జిమ్‌లో ఎంత కష్టపడతానో తెలుసా? కానీ నా శరీరం తీరే అంత.. లావు పెరుగుతూనే ఉంటుంది’ అని అరిచి చెప్పాలనిపించేది. ఒక దశలో నామీద నాకే అసహ్యం. నేను కోరుకున్నట్లుగా లేదని నా శరీరాన్ని ద్వేషించే దాన్ని. విపరీతమైన కోపం, తెలియని ఒత్తిడి. తర్వాత ఆలోచించడం మొదలుపెట్టా. నా శరీరానికేం తక్కువ? అన్ని అవయవాలూ బానే ఉన్నాయి. అవి సక్రమంగా పని చేయడం వల్లే బతికున్నా. ఇంకా ఏం కావాలి అనుకున్నాక వీటన్నింటినీ పట్టించు కోవడం మానేశా. లావు గురించి కాక ఆరోగ్యంగా ఉన్నానా లేదా అన్నదే చూసుకుంటున్నా. ఇప్పుడు ఆనందంగా ఉన్నా. మన చేతివేళ్లు అన్నీ ఒకలానే ఉండవు కదా! అలానే మనం కూడా. ఎవరో ఏదో అన్నారని మీకు మీరు తిట్టుకోవద్దు.. మారాలనుకోవద్దు. మిమ్మల్ని మీరు అంగీకరించండి చాలు.

- విద్యాబాలన్‌, నటి

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.