Updated : 23/12/2022 00:51 IST

మంచి అమ్మని కాదన్నారు!

అనుభవపాఠం

నాన్న నేవీ అధికారి. ఆయన ఉద్యోగరీత్యా దేశమంతా తిరిగా. అందుకే పెద్దగా స్నేహితులు ఉండేవారు కాదు. అలాగని ఎప్పుడూ బాధ పడలేదు. నచ్చిందా ఎంత కష్టమైనా చేస్తా. సవాళ్లెదురైనా దూసుకెళ్లే మనస్తత్వం నాది. ఆర్థిక రంగంలో స్థిరపడదామనుకున్న నేను అనుకోకుండా రేడియో పరిశ్రమలోకి వచ్చా. అదేమో బాగా నచ్చింది. కెరియర్‌ ఉన్నపళంగా మార్చుకోవడం సులువు కాదన్నారంతా. నా మీద నాకు నమ్మకం ఉంది.. కొనసాగించా. ఆర్‌జేగా మొదలై సీఓఓ స్థాయికి చేరుకున్నా. ఎఫ్‌ఎం అంటే బాలీవుడ్‌ పాటలకే ప్రాధాన్యముండే చోట దక్షిణాది పాటలనూ తీసుకొచ్చా. ప్రైవేటు రేడియో స్టేషన్‌ దేశమంతా విస్తరించేలా చేశా. ఇదంతా సులువేమీ కాలేదు. నచ్చిన పని కదా ఉత్సాహంగా దాటుకుంటూ వచ్చా. రెడ్‌ ఎఫ్‌ఎం స్టేషన్లు ప్రముఖ నగరాలన్నింటిలో ఏర్పాటు చేస్తున్నప్పుడు బాబు పుట్టాడు. నాకేమో విపరీతమైన ప్రయాణాలు.. అది చూసి ‘నువ్వు మంచి అమ్మవి కాదు’ అన్నారు చాలామంది. అది విని నాకూ తెలియని అపరాధ భావన. పరిష్కారమేంటంటే ఉద్యోగం వదిలేయడమే అన్నారు. పిల్లలు పెద్దయ్యాక స్కూలు, ఆటలంటూ వాళ్ల జీవితంతో వాళ్లు బిజీ అయిపోతారు. అప్పుడు ‘ఖాళీతనం’ ఇబ్బంది పెడుతుంది కదా! నా జీవితం అలా ముగియకూడదనుకున్నా. నా కలలు, బాబు సంరక్షణ రెంటికీ ఇబ్బంది కలగని మార్గాలను అన్వేషించా. ఇప్పటికీ ఎక్కువరోజులు ప్రయాణాల్లోనే ఉంటా. ఇంట్లో ఉన్నప్పుడు మాత్రం పూర్తి ధ్యాస కుటుంబానికే! అలా నా లోటు భర్తీ చేస్తున్నా. పిల్లలు మన ప్రేమకు ప్రతిరూపంలా తోచాలి.. కెరియర్‌కి అడ్డులా కాదు. ఎవరి కోసమో కలల్ని పక్కన పెట్టకండి. కాస్త ఆలోచిస్తే చాలు.. మార్గం దొరుకుతుంది. దాని కోసం ప్రయత్నించండి.

- నిషా నారాయణన్‌, సీఓఓ, రెడ్‌ ఎఫ్‌ఎం

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.