Breaking | Feedback | ePratibha | E-PAPER | Pratibha

136 ఏళ్ల చరిత్రలో మన అమ్మాయి!

Updated : 09 Feb 2023 00:45 IST

అగ్రరాజ్యం అమెరికాలో భారతీయ మూలాలున్న అప్సరా అయ్యర్‌ చరిత్ర సృష్టించింది. ప్రతిష్ఠాత్మక ‘హార్వర్డ్‌ లా రివ్యూ (హెచ్‌ఎల్‌ఆర్‌)కి ప్రెసిడెంట్‌గా ఎన్నికైన తొలి ఇండియన్‌ అమెరికన్‌గా నిలిచింది. యేల్‌ యూనివర్సిటీ నుంచి ఎకనామిక్స్‌, మేథ్స్‌, స్పానిష్‌ల్లో బ్యాచిలర్స్‌, ఆక్స్‌ఫర్డ్‌ నుంచి ఎంఫిల్‌ పూర్తిచేసిన అప్సర ప్రస్తుతం హార్వర్డ్‌ లా స్కూల్‌లో ఇంటర్నేషనల్‌ హ్యూమన్‌ రైట్స్‌లో ద్వితీయ సంవత్సరం చదువుతోంది. హార్వర్డ్‌ లా రివ్యూ.. పూర్తిగా విద్యార్థులు నిర్వహించే లీగల్‌ స్కాలర్‌షిప్‌ జర్నల్‌. నవంబరు నుంచి జూన్‌ వరకు నెలవారీ 2500 పేజీలతో ఈ సంచిక ప్రచురితమవుతుంది. సంపాదకీయం సహా సంస్థకు సంబంధించిన నిర్ణయాలన్నీ విద్యార్థులవే. లాయర్లుగా ప్రాక్టీసు చేస్తున్న వారికి, విద్యార్థులకు సహకరించే పరిశోధనా వస్తువుగా ఈ జర్నల్‌ ఉండాలన్నది లక్ష్యంతో 1887లో ఈ సంస్థ ప్రారంభమైంది. ప్రపంచవ్యాప్తంగా గుర్తింపు ఉన్న దానికి 29 ఏళ్ల అప్సర 137వ ప్రెసిడెంట్‌. గతంలో బరాక్‌ ఒబామా వంటి ఎందరో ప్రముఖులు దీనికి ప్రెసిడెంట్‌గా చేశారు. ‘రైట్‌ ఆన్‌’ పేరుతో జరిగే ఎంపిక ప్రక్రియ కూడా కష్టంతో కూడుకున్నదే. తన తెలివితేటలు, పరిజ్ఞానం, విశ్లేషణ నైపుణ్యాలు, వాదనా పటిమతో అందరి మనసూ గెలుచుకుంది మన అప్సర. తనకి పురాతన వస్తువులపై అభిమానం. హార్వర్డ్‌లో చేరడానికి ముందు మన్‌హాటన్‌ డిస్ట్రిక్ట్‌ అటార్నీలో యాంటిక్‌ ట్రాఫికింగ్‌ యూనిట్‌లో పనిచేసింది. 15 దేశాలకు చెందిన దొంగతనానికి గురైన 1100 ఆర్ట్‌ వర్క్‌ను తిరిగి పొందేలా అధికారులకు సాయపడింది. అక్కడా పేరు ప్రఖ్యాతులను సంపాదించాక ఆమె మనసు మానవ హక్కులవైపు మళ్లింది. అప్సర గతంలో నేషనల్‌ సెక్యూరిటీ, హ్యూమన్‌ రైట్స్‌ జర్నల్స్‌లో పనిచేసింది. సౌత్‌ ఏషియన్‌ లా స్టూడెంట్‌ అసోసియేషన్‌ సభ్యురాలు కూడా. ‘కేసుల రివ్యూలు, వ్యాసాల ఎంపికలో మరింత మందిని భాగస్వాములను చేయడంతోపాటు నాణ్యమైన సమాచారాన్ని అందించడమే తన ధ్యేయ’మనే అప్సర భవిష్యత్తులో మానవ హక్కుల రక్షణలో తన గళాన్ని వినిపించాలనుకుంటోంది.

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.