Trains collide: చైనాలో రెండు మెట్రో రైళ్లు ఢీ.. 515 మందికి గాయాలు!

బీజింగ్‌: చైనా రాజధాని బీజింగ్‌లో (Beijing) రెండు మెట్రో రైళ్లు ఢీ కొన్నాయి. ఈ ఘటనలో 515 మందికి గాయాలైనట్లు అధికారులు వెల్లడించారు. వీరిలో 102 మందికి తీవ్ర గాయాలయ్యాయని.. ప్రాణనష్టం జరగలేదని తెలిపారు. ఇప్పటికే నాలుగు వందల మంది ఆసుపత్రుల నుంచి డిశ్చార్జ్‌ అయినట్లు ప్రకటించారు. భారీగా మంచు కురుస్తున్న సమయంలో ఈ ప్రమాదం జరిగిందన్నారు. మంచు కారణంగా జారుతున్న ట్రాకులపై సరిగ్గా బ్రేకులు పడకపోవడంతోనే రైలు ఢీ కొన్నాయని అన్నారు. గురువారం రాత్రి ఈ ప్రమాదం జరిగినట్లు బీజింగ్‌ రవాణా అధికారులు వెల్లడించారు.

ప్రపంచంలో అత్యంత బిజీ మెట్రో రైల్‌ వ్యవస్థలో బీజింగ్‌ ఒకటి. ఇక్కడ 27 మార్గాల్లో నిత్యం 1.30కోట్ల మంది ప్రయాణిస్తుంటారు. రద్దీ సమయంలో నిమిషానికొక రైలు సర్వీసు అందుబాటులో ఉంటుంది. అయితే, కొన్ని రోజులుగా అక్కడ విపరీతంగా మంచు కురుస్తోంది. దీంతో స్కూళ్లతోపాటు బహిరంగ వినోద కేంద్రాలను అధికారులు మూసివేశారు. ఈ క్రమంలో పౌరులు ప్రజా రవాణాకే ప్రాధాన్యం ఇవ్వాలని సూచించారు. మూడు రోజులుగా అక్కడి మెట్రో రైళ్లలో విపరీతమైన రద్దీ పెరిగినట్లు అధికారులు వెల్లడించారు.