Rishi Sunak: ‘లెక్కల్లో వెనుకబాటు..! బ్రిటన్‌ ధోరణి మారాలి’

లండన్‌: గణితం (Maths) విషయంలో బ్రిటన్‌ (Britain) తన వ్యతిరేక ధోరణిని మార్చుకోవాల్సిన అవసరం ఉందని ప్రధాని రిషి సునాక్‌ (Rishi Sunak) పేర్కొన్నారు. లెక్కల్లో విద్యార్థుల వెనుకబాటును తగ్గించేందుకు కృషి చేస్తానని తెలిపారు. ఈ విషయంపై రిషి సునాక్‌ సోమవారం ప్రసంగించారు. లెక్కల్లో తాము వెనుకబడి ఉన్నామని జోకులు చేసుకోవడం ఆమోదయోగ్యం కాకూడదని అన్నారు. ‘ఏ’ లెవల్‌లో అత్యంత ఆదరణ పొందిన సబ్జెక్టుల్లో మ్యాథ్స్ ఒకటని, అయితే దీన్ని తగినంతగా నేర్చుకోని వారూ ఉన్నారని చెప్పారు. ఈ విషయంలో ‘ఆటిట్యూడ్‌’ సమస్య ఉన్నట్లు తెలిపారు.

గణితంపై మరింత దృష్టి సారించాలని తన కుమార్తెలకూ సూచించినట్లు రిషి గుర్తుచేసుకున్నారు. అయితే వారు ఆసక్తి చూపడం లేదని చెప్పారు. ‘మేం లెక్కలు చేయలేం.. ఈ సబ్జెక్టు మా కోసం కాదని కొందరు జోకులు వేస్తుంటారు. కానీ, చదవలేమ(Read)ని ఎవరూ అనరు. కాబట్టి, మనం ఈ గణిత వ్యతిరేక వైఖరిని మార్చుకోవాలి’ అని పేర్కొన్నారు. సృజనాత్మక రంగాల మొదలు ఆర్థిక రంగం వరకు గణితం ముఖ్యమైందన్నారు. ఈ క్రమంలోనే విద్యార్థులు మరింత గణితం నేర్చుకునేలా ప్రభుత్వానికి సలహాలు ఇచ్చేందుకు.. గణిత శాస్త్రజ్ఞులు, విద్యావేత్తలు, వ్యాపార ప్రతినిధులతో సలహా బృందం ఏర్పాటు చేస్తామని తెలిపారు.

ఉపాధ్యాయులూ ఈ దిశగా ముందుకు రావాలని రిషి సునాక్‌ పిలుపునిచ్చారు. ప్రాథమిక పాఠశాలల్లో గణితాన్ని బోధించేలా టీచర్లలో విశ్వాసం పెంపొందించాలని ప్రభుత్వం భావిస్తున్నట్లు చెప్పారు. ఒకవేళ ఇదే సాధ్యమైతే.. యువత మేలైన భవిష్యత్తు కోసం తోడ్పడిన వారమవుతామని తెలిపారు. అయితే, ఈ ప్రణాళికను అమలు చేసేందుకు బ్రిటన్‌కు ఎక్కువ మంది గణిత ఉపాధ్యాయులు అవసరమని కూడా ప్రధాని రిషి సునాక్‌ తెలిపారు.