France: ఫ్రాన్స్‌లో 25ఏళ్లలోపు వారికి ఉచితంగా కండోమ్‌లు: అధ్యక్షుడు మేక్రాన్‌ ప్రకటన

ప్యారిస్‌: ఫ్రాన్స్‌లో 25 ఏళ్లలోపు వయసున్న ఎవరైనా జనవరి ఒకటో తేదీ నుంచి ఔషధ దుకాణాల్లో ఉచితంగా కండోమ్‌లు పొందొచ్చని ఆ దేశ అధ్యక్షుడు ఇమ్మాన్యుయేల్‌ మేక్రాన్‌ శుక్రవారం ప్రకటించారు. యువతలో పెరిగిపోతున్న లైంగిక అంటురోగాలకు అడ్డుకట్ట వేసేందుకే ఈ నిర్ణయం తీసుకున్నట్లు ప్రభుత్వవర్గాలు తెలిపాయి. ఫ్రాన్స్‌లో ఇప్పటికే 25 ఏళ్లలోపు బాలికలు, యువతులు ఉచితంగా కండోమ్‌లు పొందుతున్నారు.

అవాంఛిత గర్భధారణలను అడ్డుకునేందుకు ప్రభుత్వం ఈ సదుపాయం కల్పించింది. వాస్తవానికి గురువారం మేక్రాన్‌ మాట్లాడుతూ.. జనవరి ఒకటో తేదీ నుంచి 18-25 ఏళ్లలోపు వారు ఔషధ దుకాణాల్లో ఉచితంగా కండోమ్‌లు పొందొచ్చని ప్రకటించారు. అనంతరం ఫ్రెంచ్‌ టీవీ ప్రెజెంటర్‌ ఒకరు, మరికొందరు వ్యక్తులు సామాజిక మీడియాలో అధ్యక్షుడి నిర్ణయాన్ని ప్రశ్నించారు. మైనర్లను ఎందుకు చేర్చలేదని నిలదీశారు. దీంతో ఈ కార్యక్రమాన్ని వారికీ విస్తరిస్తున్నట్లు అధ్యక్షుడు ప్రకటించారు. ఈ మేరకు ప్రస్తుతం స్పెయిన్‌లో ఉన్న ఆయన ఓ సెల్ఫీ వీడియోను పోస్ట్‌ చేశారు. ‘అలాగే చేద్దాం’ అని అందులో పేర్కొన్నారు. ‘‘చాలా మంది మైనర్లు కూడా శృంగారంలో పాల్గొంటున్నారు. తమనుతాము రక్షించుకోవడం వారికీ అవసరం’’ అని ట్విటర్‌లో వెల్లడించారు.