ఆమె వేగం ముందు బీఎండబ్ల్యూ... ఉఫ్‌!

మహిళా జయహో

ఆమె వేగం ముందు బీఎండబ్ల్యూ... ఉఫ్‌!

చాలా చిన్నవయసులోనే ఫార్మూలావన్‌ కార్ల రేసులో అడుగుపెట్టింది మీరా. 20 ఏళ్లకే ఎన్నో విజయాలని తన ఖాతాలో వేసుకుంది. ముఖ్యంగా ఫార్ములా-4 బీఎండబ్ల్యూ కార్లని అత్యంత వేగంగా నడిపే పిన్కవయస్కురాలీమె.. మీరా తండ్రి కిరిత్‌ఎర్దాకు సొంతంగా గోకార్టింగ్‌ ట్రాక్స్‌ ఉండటంతో రేస్‌లో అ..ఆలు అక్కడే నేర్చుకుందామె. హైస్కూల్‌ రోజుల్లోనే రేసుల్లో పాల్గొని మంచి పేరు తెచ్చుకోవాలని నిర్ణయించుకుంది. 14వ ఏట ఫార్ములాకారు రేస్‌లోకి దిగిన మీరా ఎక్కడా వెనుతిరగలేదు. వేగమంటే ప్రాణం అని చెప్పే ఈమె దీనికోసం రెండేళ్లపాటు కఠినశిక్షణ తీసుకుంది. తనీడు పిల్లలు పాఠశాలలో ఉంటే.. మీరా మాత్రం ట్రాక్‌లో గడిపేది. స్నేహితులు, పాఠాలకు దూరమవడం కొంత బాధే అయినా దానికి మించిన కిక్‌ తనకు కారు రేస్‌లో ఉండటంతో ఇటువైపే మొగ్గు చూపా అంటుంది మీరా.

‘జేకే రేసింగ్‌ ఛాంపియన్‌షిప్‌- 2014’ పోటీలో పాల్గొని ఇండియాలోనే చిన్నవయసు ఫార్ములా 4 గర్ల్‌ డ్రైవర్‌గా పేరు సంపాదించా. అక్కడ నుంచి మరో మూడేళ్లకి మనదేశంలోనే ప్రతిష్టాత్మకమైన ‘జేకే టైర్‌- ఎఫ్‌ఎంఎస్‌సీఏ నేషనల్‌ రేసింగ్‌ ఛాంపియన్‌ షిప్‌’లో పోటీ చేసి ఇందులో పాల్గొన్న తొలి భారతీయ మహిళారేసర్‌గా రికార్డులకెక్కా. వాస్తవానికి ఇది నా చిన్ననాటి కల కూడా’ అనే మీరా 1600సీసీ సామర్థ్యం ఉండే ఫార్ములా-4 బీఎండబ్ల్యూ కారుని గంటకు 230 కిలోమీటర్ల వేగంతో నడపగలదు. ఈ వేగమే ఆమెకు ‘ఆల్‌ ఫిమేల్‌ సింగిల్‌ సీటర్‌ డబ్ల్యూ సీరీస్‌ 2019’ పట్టికలో ప్రముఖుల పక్కన చోటు దక్కేలా చేసింది. ఒక్క మన దేశంలోనే కాదు అంతర్జాతీయ స్థాయిలో కూడా అత్యంత చిన్న వయసులో మోటార్‌స్పోర్ట్స్‌ రంగంలో రాణిస్తున్న యువతిగా మీరా తన ప్రత్యేకతను చాటుతోంది. త్వరలో ‘జేకే టైర్స్‌ నేషనల్‌ లీగ్‌ ఛాంపియన్‌షిప్‌’కు సిద్ధమవుతోంది. రోజూ రెండుగంటలపాటు వ్యాయామం, యోగా, పుస్తకపఠనం, అమ్మచేసే వంటలు తినడం ఇష్టం అంటోంది. ఆమె జర్నలిజం అండ్‌ మాస్‌ కమ్యూనికేషన్స్‌ చదువుతోంది. ‘ట్రాక్‌లో గెలిస్తే ఇంటికెళ్లి సెలబ్రేట్‌ చేసుకుంటా. ఓటమెదురైతే నా బలహీనతలు, పొరపాట్లను విశ్లేషించి మరోసారి జరగకుండా చూసుకుంటా. నాకిష్టమైన చోటు రేస్‌కారు క్యాబినే. ఒక్కసారి హెల్మెట్‌ ధరించానంటే నా కళ్లెదుట ట్రాక్, చేరుకోవాల్సిన లక్ష్యం తప్ప మరేవి కనిపించవు’ అని అంటోంది మీరా.

Tags :