స్పోర్ట్స్‌ స్టార్‌

ఈ లడ్డు.. వెరీ గుడ్డు!

లావు తగ్గించుకోవడానికి ఎన్నో మార్గాలు. ఆ పిల్లాడి తల్లితండ్రులు మాత్రం కబడ్డీనే కరెక్ట్‌ అనుకున్నారు. చిన్నప్పుడు అయిష్టంగానే ఆట మొదలెట్టిన ఆ లడ్డు బాబు.. మొదట తన ఆకారంతో ప్రత్యర్థి జట్లను భయపెట్టి పాయింట్లు సాధించేవాడు. రైడింగ్‌ వచ్చిన వాళ్లపై పడిపోయి.. వారి కూత ఆగిపోయేలా చేసేవాడు..! ఇదంతా పదమూడేళ్ల కిందటి సంగతి.. ఇప్పుడూ.. ఆ కుర్రాడిని చూసి ప్రత్యర్థి ఆటగాళ్లు భయపడిపోతారు. అయితే అతడి ఆకారాన్ని చూసి కాదు.. అతడు కూతకు వస్తే పాయింట్లు కోల్పోతామన్న కారణంతో..! ఆ లడ్డు బాబు.. ఇప్పుడు ప్రొకబడ్డీలో సూపర్‌ స్టార్‌. అతడు మరెవరో కాదు.. పవన్‌ సెహ్‌రావత్‌. బెంగళూరు బుల్స్‌ తొలిసారి ప్రొకబడ్డీ టైటిల్‌ గెలుచుకోవడంలో కీలకపాత్ర పోషించిన ఆటగాడు. ప్రస్తుత సీజన్‌లో అదిరే ఫామ్‌లో ఉన్న రైడర్‌ అతడే. ఇష్టం లేకపోయినా కోర్టులో అడుగుపెట్టి.. ఆ తర్వాత ఛాంపియన్‌గా నిలిచిన అతని ప్రస్థానం ఆసక్తికరం.

మ్యాట్‌పై రెండు వైపుల నుంచి రైడింగ్‌ చేయగల సామర్థ్యం.. వీధుల్లో ఆడే కబడ్డీ నుంచి పుణికిపుచ్చుకొన్న తెలివితేటలు.. పరిగెత్తుతూ ప్రత్యర్థి డిఫెండర్లను బోల్తా కొట్టించగల నైపుణ్యం.. కలగలిపి ఈ 23 ఏళ్ల యువ ఆటగాడు దూసుకెళ్తున్నాడు. ఆరో సీజన్‌లో 24 మ్యాచ్‌ల్లో 271 పాయింట్లతో అత్యధిక పాయింట్ల వీరుల జాబితాలో అగ్రస్థానంలో నిలిచి జట్టుకు ఒంటిచేత్తో ప్రొకబడ్డీ టైటిల్‌ అందించాడు. ఈ సీజన్‌లోనూ తన ఫామ్‌ను కొనసాగిస్తూ పవన్‌ జట్టు విజయాల్లో కీలక పాత్ర పోషిస్తున్నాడు.

బొద్దుగా ఉన్నాడని: పవన్‌ చిన్నతనంలో చాలా లావుగా, బొద్దుగా కనిపించేవాడు. తన వయసు పిల్లలతో పోలిస్తే బరువు రెండింతలు ఉండేది. దాంతో సరిగా నడవడం కష్టమయ్యేది. విచిత్రం ఏంటంటే అతని బరువే కబడ్డీ వైపు తనను మళ్లించింది. తల్లితండ్రుల ప్రోత్సాహంతో.. పాఠశాల వ్యాయామ ఉపాధ్యాయుడి చొరవతో అయిష్టంగానే కోర్టులో అడుగు పెట్టాడు. కానీ తనను చూసి ప్రత్యర్థి ఆటగాళ్లు భయపడుతుండడంతో ఆటపై ఆసక్తి మొదలైంది. లావైన ఆకారంతో అతను రెచ్చిపోసాగాడు. జోన్‌ స్థాయి టోర్నీల్లోనూ మెరుగైన ప్రదర్శనతో సత్తాచాటాడు. దాంతో కబడ్డీనే కెరీర్‌గా ఎంచుకోవాలని నిర్ణయించుకున్నాడు. ప్రత్యేక శిక్షణ తీసుకోవడం మొదలెట్టాడు. ‘‘చిన్నపుడు కబడ్డీపై అంతగా ప్రేమ ఉండేది కాదు. కానీ నన్ను చూసి ప్రత్యర్థి ఆటగాళ్లు భయపడుతుంటే ఆటపై ఇష్టం పెరిగింది. అప్పట్లో ఆటగాళ్ల బరువుపై పరిమితులు ఉండేవి కావు. దాంతో కోర్టులో దిగి ప్రత్యర్థి రైడర్లపై పడి వాళ్లను ఔట్‌ చేసేవాణ్ని. దాంతో ఈ ఆట సులభంగా అనిపించేది. నేనూ ఆడొచ్చు అనుకున్నా’’ అని పవన్‌ తెలిపాడు.

చలేసినా.. వర్షం కురిసినా: కబడ్డీలో ప్రస్తుత స్థాయికి చేరుకోవడానికి పవన్‌ ఎన్నో గడ్డు పరిస్థితులు ఎదుర్కొన్నాడు. ఇప్పుడు అతను ఆటలో సూపర్‌ స్టార్‌. కానీ తన ప్రయాణం మాత్రం ఒడుదొడుకులతో సాగింది. తొలి రోజుల్లో శిక్షణ కోసం ఇంటి నుంచి ఎనిమిది కిలోమీటర్ల దూరంలో ఉన్న ఖేడా గ్రామానికి వెళ్లాల్సి వచ్చేది. సైకిల్‌పై రోజూ దాదాపు 15 కిలోమీటర్లు ప్రయాణం చేసేవాడు. పొద్దున్నే 3 గంటలకు లేచి.. నాలుగు గంటలకల్లా శిక్షణ ప్రాంతానికి వెళ్లి సాధనలో నిమగ్నమయ్యేవాడు. నీళ్లు గడ్డ కట్టేంత చలి వేసినా.. జోరున వర్షం కురిసినా శిక్షణకు వెళ్లడం మాత్రం ఆపేవాడు కాదు. తనతో పాటు కొంతమంది స్నేహితులు కూడా శిక్షణకు హాజరయ్యేవాళ్లు. కొన్ని సందర్భాల్లో మాత్రం పవన్‌ ఒంటరిగా ప్రయాణం చేయాల్సి వచ్చేది. వెళ్లేటప్పుడు పెద్దగా ఇబ్బంది అనిపించకపోయినా కూడా.. సాధన చేసి పూర్తిగా అలసి పోయిన తర్వాత సైకిల్‌ తొక్కుతూ తిరిగి ఇంటికి చేరాలి అంటే శారీరకంగా పూర్తిస్థాయి ఫిట్‌నెస్‌ కావాలి. దాని కారణంగానే తన ఫిట్‌నెస్‌పై దృష్టి పెట్టి సామర్థ్యం పెంపొందించుకున్నాడు. ఎట్టి పరిస్థితుల్లోనూ శిక్షణకు డుమ్మా కొట్టకూడదని నిర్ణయించుకొన్న అతను అంకితభావంతో సాధన చేసేవాడు. మరోవైపు పవన్‌ది దిగువ మధ్య తరగతి కుటుంబం కావడంతో ఆర్థికంగా ఇబ్బందులు ఎదురయ్యేవి. తండ్రి చేస్తున్న వ్యాపారంలో తీవ్ర నష్టాలు వచ్చి పేదరికం ఆ కుటుంబాన్ని ముంచెత్తింది. ఈ సమస్యలన్నీ తొలగిపోవాలంటే ఆటలో రాణించడం ఒకటే తన ముందున్న మార్గమని అతను నిర్ణయించుకున్నాడు. పాఠశాలల జాతీయ ఛాంపియన్‌షిప్‌లో సత్తాచాటాడు. ఆ తర్వాత విశ్వవిద్యాలయ క్రీడల్లోనూ మెరిశాడు. ఉత్తర రైల్వే జట్టు కోసం ట్రయల్స్‌లో పాల్గొన్న పవన్‌.. బెంగళూరు బుల్స్‌ కోచ్‌ రణ్‌ధీర్‌ సింగ్‌ కంట్లో పడడంతో అతని దశ తిరిగింది.

వదిలేద్దామనుకొని: భారత రైల్వేలో పవన్‌కు ఉద్యోగం వచ్చేలా చేసిన రణ్‌ధీర్‌ అతణ్ని బుల్స్‌ జట్టులోకి తీసుకున్నాడు. అలా మూడో సీజన్‌లో అతను పీకేఎల్‌లో అడుగుపెట్టాడు. ఆ సీజన్‌లో 45 రైడ్‌ పాయింట్లతో జట్టు తరపున అత్యధిక పాయింట్లు సాధించిన ఆటగాడిగా నిలిచాడు. కానీ ఆ తర్వాత రెండు సీజన్లలో అతని ప్రదర్శన ఆశించిన స్థాయిలో లేదు. ఫామ్‌ కోల్పోయిన అతను పాయింట్లు రాబట్టడంలో పూర్తిగా విఫలమయ్యాడు. లయను అందుకోవడంతో తీవ్ర ఇబ్బందులు పడ్డాడు. దాంతో బుల్స్‌ అతణ్ని వదులుకుంది. ఐదో సీజన్‌లో గుజరాత్‌ తరఫున ఆడినా పవన్‌ ఆటలో ఎలాంటి మార్పు రాలేదు. దాంతో ఎక్కువ మ్యాచ్‌ల్లో బెంచ్‌కే పరిమితమయ్యాడు. తీవ్ర నిరాశలో మునిగిపోయి ఆటకే గుడ్‌బై చెప్పేద్దామనే నిర్ణయానికి వచ్చాడు. కానీ కోచ్‌ రణ్‌ధీర్‌ మరోసారి పవన్‌కు అండగా నిలిచాడు. ఆరో సీజన్‌లో బుల్స్‌ జట్టులోకి తీసుకుంటానని మాట ఇచ్చాడు. అతని ఆటలో ఎలాంటి మార్పులు అవసరమో సూచించి.. ఆత్మవిశ్వాసాన్ని నింపాడు. దాంతో తిరిగి ఆటపై దృష్టి పెట్టిన అతను తీవ్రంగా కష్టపడ్డాడు. రన్నింగ్‌ హ్యాండ్‌టచ్‌, డుబ్కీ లాంటి నైపుణ్యాలను ఒంటపట్టించుకున్నాడు. సరికొత్తగా సిద్ధమయ్యాడు. ఆరో సీజన్‌లో జట్టులో అడుగుపెట్టి కసితీరా పాయింట్లు సాధించాడు. తన సత్తాచాటాడు. ఫైనల్లో 22 పాయింట్లతో బుల్స్‌ను తొలిసారి పీకేఎల్‌ విజేతగా నిలిపాడు. ప్రస్తుత సీజన్‌లోనూ 74 పాయింట్లతో పాయింట్ల వీరుల జాబితాలో అగ్రస్థానంలో కొనసాగుతున్నాడు.

Tags :

మరిన్ని

జిల్లా వార్తలు

చదువు సుఖీభవ మకరందం ఈతరం ఆహా హాయ్ బుజ్జీ స్థిరాస్తి కథామృతం రుచులు దేవతార్చన

స్పోర్ట్స్‌ స్టార్‌

మరిన్ని

App