కార్డే కదా అనుకున్నారో..!

తాజావార్తలు


కార్డే కదా అనుకున్నారో..!
ఖాతా ఖాళీ కావడం ఖాయం
హైదరాబాద్‌: కిరాణా కొట్టుకెళ్లి సరకులు కొనాలంటే కార్డు.. బ్యాంకు మొహం చూడకుండానే వేరొకరి ఖాతాకు డబ్బు పంపించాలంటే మళ్లీ కార్డు.. చివరకు థియేటర్‌కు వెళ్లకుండా సినిమా టికెట్లు బుక్‌ చేయాలన్నా కార్డే.. ప్లాస్టిక్‌ మనీగా పిలిచే క్రెడిట్‌/డెబిట్‌ కార్డుల వినియోగం ఇలా రోజురోజుకీ విస్తరిస్తోంది. తాజాగా పెద్ద నోట్ల రద్దు వ్యవహారంతో వీటి అవసరం ఇంకా పెరిగింది. నగదు అందుబాటులో లేకపోవడంతో రాబోయే రోజుల్లో వీటితో లావాదేవీలు మరింత పెరగడం ఖాయం. అయితే.. కార్డులను వినియోగించడంలో ఖాతాదారులు చూపిస్తున్న శ్రద్ద్ధ.. సైబర్‌ నేరగాళ్ల నుంచి ఎదురయ్యే ముప్పును తప్పించుకునేందుకు చూపించకపోవడం ఆందోళన కలిగిస్తోంది. ఏమాత్రం వీలు చిక్కినా కార్డుల వివరాలు తస్కరించి డబ్బు కాజేసేందుకు నేరస్థులు పొంచి ఉంటున్నారు. ఈ నేపథ్యంలో ప్లాస్టిక్‌ మనీతో జరిగే మోసాలు, ఆయా లావాదేవీల్లో వ్యవహరించాల్సిన తీరు, వినియోగంలో తీసుకోవాల్సిన జాగ్రత్తలపై కథనం.

ఆ వలకు చిక్కకండి..
ఇప్పుడు బ్యాంకులో పొదుపు ఖాతా ఉన్న ప్రతీ ఒక్కరికి డెబిట్‌ కార్డును అందజేస్తున్నారు. నగదు ఉపసంహరణ కోసం బ్యాంకు చుట్టూ తిరిగేకంటే ఏటీఎం కేంద్రానికి వెళ్లి తీసుకునేందుకు ఈ కార్డు చాలా వరకు ఉపయోగపడుతుంది. దీనికితోడు కూర్చున్న చోటు నుంచి కదలకుండానే ఆన్‌లైన్‌లో కంప్యూటర్‌ లేదా చరవాణితో నగదు బదిలీ చేసేందుకు ఉపకరిస్తుంది. ఇక ప్రభుత్వ, ప్రైవేటు ఉద్యోగులు, వ్యాపారులు, ఆదాయ పన్ను చెల్లించే వారికి బ్యాంకులే ఫోన్లు చేసి మరీ క్రెడిట్‌ కార్డులందిస్తున్నాయి. ఇలా సులభంగానే ప్లాస్టిక్‌మనీ లభిస్తుండటంతోపాటుగా... వీటి ద్వారా లావాదేవీల నిర్వహణ సులువు కావడంతో వినియోగం సహజంగానే పెరిగింది. చాలా మంది కార్డును స్వైప్‌ చేసినంత సులభంగా సైబర్‌ నేరగాళ్ల వలకు చిక్కుతున్నారు. వారి బారి నుంచి తప్పించుకోవాలంటే ఈ జాగ్రత్తలు తీసుకోవాల్సిందే..

బ్యాంకు నుంచి కార్డు అందినప్పుడు కవర్‌ పూర్తిగా సీల్‌ చేసి ఉందా..? అనేది తప్పక గమనించాలి. సీల్‌ తీసినట్టుగానో, చిరుగు ఉన్నట్టో గుర్తిస్తే వెంటనే బ్యాంకు అధికారులకు ఫిర్యాదు చేయాలి. ఎందుకంటే సైబర్‌ నేరగాళ్లు ఆ వివరాలను మీకు చేరకముందే కాజేసే ప్రమాదముంది. లేదంటే కవర్లను సరఫరా చేసే ఏజెన్సీ సిబ్బందిని మచ్చిక చేసుకుని అలా చేసేందుకూ అవకాశముంది.

కార్డు అందుకున్న వెంటనే వెనక భాగంలో మీ సంతకం చేయాలి. బ్యాంకు కేటాయించిన పిన్‌ నంబర్‌ను వెంటనే మార్చి కొత్త నంబరును పెట్టుకోవాలి. నంబరును ప్రతీ మూడు నెలలకోసారి మారుస్తూ ఉండాలి. కొందరు ఏళ్ల తరబడి దాన్నే కొనసాగిస్తారు. అంతేకాకుండా మరిచిపోతామనే భయంతో సొంత వాహనం నంబరునో, సెల్‌నంబర్‌లోని అంకెలనో, జన్మదినాన్నో పిన్‌గా ఉపయోగిస్తారు. అలా కాకుండా గుర్తించడానికి వీల్లేని అంకెలతో పిన్‌ నంబర్‌ ఉండాలి. కొంతమంది ఆ నంబర్‌ను కార్డు కవర్‌ పైన రాయడమో, సెల్‌లో నిక్షిప్తం చేయడమో చేస్తారు. అలా చేయడం ప్రమాదకరం. ఒకవేళ నేరగాళ్లు సెల్‌ను హ్యాక్‌ చేస్తే సమాచారమంతా వారి చేతిలో పడుతుంది.

కార్డు వెనకభాగంలో ఉన్న మూడు అంకెలు (సీవీవీ) కనిపించకుండా ఏదైనా చిన్న కవర్‌తో కప్పివేయాలి. ఆన్‌లైన్‌ లావాదేవీల్లో సీవీవీ నంబరే కీలకం. కార్డు వెనక ఉండే గ్రిడ్‌ నంబర్ల సమాచారాన్నీ వేరే వ్యక్తులతో పంచుకోవద్దు. ఖాతా నుంచి నగదును బదిలీ చేసిన ప్రతీసారి సీవీవీ, గ్రిడ్‌ నంబర్లను వినియోగించాల్సి ఉంటుంది. అందుకే వాటిని గోప్యంగా ఉంచాలి.

ఆన్‌లైన్‌ లావాదేవీల కోసం బ్యాంకు ఖాతాకు మీరు నిత్యం వినియోగించే చరవాణి సంఖ్యతోపాటు మెయిల్‌ ఐడీని అనుసంధానం చేయాలి. అలా చేస్తేనే లావాదేవీ జరిగిన ప్రతీసారి చరవాణికి, మెయిల్‌కు సమాచారం అందుతుంది. నేరగాళ్లు మీ ఖాతా నుంచి నగదు కాజేసే ప్రయత్నం చేస్తే .. ఆ సమాచారం వెంటనే అందుతుంది. తక్షణమే బ్యాంకు అధికారులకు, సైబర్‌క్రైమ్‌ పోలీసులకు ఫిర్యాదు చేస్తే డబ్బు చేజారకుండా కాపాడుకోవచ్చు.

ఆర్‌బీఐ, ఆదాయ పన్ను కార్యాలయం, బ్యాంక్‌.. ఇలా ఏదో ఓ చోట నుంచి మాట్లాడుతున్నట్టు నేరగాళ్లు ఫోన్‌ చేస్తారు .. లేదా మెయిల్‌ పంపిస్తారు. పాస్‌వర్డ్‌, కస్టమర్‌ ఐడీ, పిన్‌నంబర్‌, సీవీవీ నంబర్‌, వ్యక్తిగత వివరాలు అడుగుతారు. అలా అడిగారంటే నూటికి నూరు శాతం అది సైబర్‌ నేరగాళ్ల పనే.

షాపింగ్‌ మాల్స్‌లో. వస్త్ర దుకాణాల్లో.. ఏటీఎంల్లో..
* ప్రస్తుతం అంతా క్రెడిట్‌, డెబిట్‌ కార్డుల వినియోగమే కావడంతో షాపింగ్‌మాల్‌, పెట్రోల్‌బంక్‌, హోటల్‌, వస్త్రదుకాణం, రెస్టారెంట్‌, సినిమా ... ఇలా ఎక్కడికెళ్లినా వీటి ద్వారానే కొనుగోలు చేస్తుంటారు. అలాంటి సమయాల్లో ఈ జాగ్రత్తలు పాటించాలి.

* కొందరు దుకాణదారులు కార్డును లోపలికి తీసుకెళ్లి స్వైప్‌ చేస్తామని, పిన్‌ నంబర్‌ను చెప్పమంటారు. అది అత్యంత ప్రమాదకరం. మన కళ్ల ఎదురుగానే కార్డును యంత్రంలో స్వైప్‌ చేయాలని డిమాండ్‌ చేయాలి. చాటుకు తీసుకెళ్తే స్వైపింగ్‌ యంత్రంలో స్కిమ్మర్‌ను అమర్చి క్లోనింగ్‌ చేసే అవకాశముంది. అలా చేస్తే కార్డు సమగ్ర వివరాలు వారి చేతుల్లోకి వెళ్లిపోతాయి. కార్డును స్వైప్‌ చేశాక పిన్‌ నంబర్‌ను బయటివారెవరికీ కనిపించకుండా మనమే చాటుగా నమోదు చేయాలి.

* షాపింగ్‌మాల్స్‌ ఎదుట కొందరు బహుమతులు ఇస్తామని ఆశ చూపి.. తాము చేస్తున్న సర్వే కోసం కార్డుల వివరాలు నమోదు చేయాలని ఎర వేస్తారు. వారి గాలానికి చిక్కొద్దు. చిన్న బహుమతి కోసం ఆశ పడితే బ్యాంకు ఖాతాల్లో సొమ్ము మాయమవుతుంది.

* ఏటీఎం యంత్రాల్లోని కార్డు రీడర్ల (కార్డును లోపలికి పెట్టే ప్రాంతం)లో, నంబర్లను ప్రెస్‌ చేసే ప్రదేశంలో ఏమైనా తాత్కాలికంగా అమర్చారా..?, పిన్‌ నంబర్‌ నమోదు చేసే ప్రదేశం కనిపించేలా పైభాగంలో ఏదైనా రహస్య కెమెరా ఉందా..? అని తనిఖీ చేయాలి. సెక్యూరిటీ గార్డులు లేని ఏటీఎంల్లో ఈ విధంగా జరిగే అవకాశముంది. వాటిని గుర్తించకపోతే కార్డు వివరాల్ని తస్కరించి(స్కిమ్మింగ్‌), అనంతరం నకిలీ కార్డులు(క్లోనింగ్‌) తయారు చేసి నగదు కాజేసే ప్రమాదం ఉంది.

FileName

  • FileName
మరిన్ని
FileName
FileName

  • FileName
మరిన్ని
FileName

  • FileName
మరిన్ని

  • FileName
మరిన్ని

  • FileName
మరిన్ని

  • FileName
మరిన్ని

  • FileName
మరిన్ని
జిల్లా వార్తలు

దేవ‌తార్చ‌న

రుచులు

© 1999- 2016 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.